भारतरत्न लता मंगेशकर यांच्या भगिनीचा अंत; सहा दशकांची सुरेल कारकीर्द थांबली
मुंबई : हिंदी आणि भारतीय संगीतसृष्टीतील अजरामर आवाज म्हणून ओळखल्या जाणाऱ्या ज्येष्ठ गायिका आशा भोसले यांचे वयाच्या 92 व्या वर्षी निधन झाल्याची धक्कादायक बातमी समोर आली आहे. त्यांच्या निधनाने संगीतविश्वावर शोककळा पसरली असून, एका युगाचा अंत झाल्याची भावना व्यक्त होत आहे.
भारतरत्न लता मंगेशकर यांच्या लहान भगिनी असलेल्या आशा भोसले या हिंदी सिनेसृष्टीतील सर्वात बहुमुखी गायिका म्हणून ओळखल्या जात होत्या. तब्बल सहा दशकांहून अधिक काळ त्यांनी आपल्या सुरेल आवाजाने रसिकांच्या मनावर अधिराज्य गाजवले. हिंदीसह मराठी, बंगाली, गुजराती, तमिळ, तेलुगू अशा अनेक भाषांमध्ये त्यांनी हजारो गाणी गायली. त्यांनी आर. डी. बर्मन, ओ. पी. नाय्यर, देव बर्मन, आणि लक्ष्मीकांत प्यारेलाल यांसारख्या दिग्गज संगीतकारांसोबत काम करत अनेक अजरामर गाणी दिली. ‘दम मारो दम’, ‘ओम शांती ओम’ यांसारखी गाणी आजही संगीतप्रेमींच्या ओठांवर आहेत.
त्यांचे पुत्र आनंद भोसले यांनी माध्यमांशी संवाद साधताना साश्रू नयनांनी त्यांच्या निधनाची माहिती दिली. त्यांनी सांगितले की, आशाताईंवर सोमवारी सकाळी 11 ते दुपारी 3 या वेळेत अंत्यदर्शनासाठी व्यवस्था करण्यात येणार आहे. त्यानंतर अंत्ययात्रा निघून सायंकाळी 4 वाजता शिवाजी पार्क स्मशानभूमी येथे शासकीय इतमामात अंत्यसंस्कार करण्यात येणार आहेत.
काही दिवसांपूर्वी प्रकृती अस्वस्थ झाल्याने त्यांना ब्रीच कॅन्डी रुग्णालय येथे दाखल करण्यात आले होते. त्यांच्या नात जनाई भोसले हिने सोशल मीडियावर पोस्ट करत त्यांना छातीचा संसर्ग आणि अशक्तपणा असल्याची माहिती दिली होती. उपचार सुरू असतानाच त्यांनी अखेरचा श्वास घेतला. दरम्यान, त्यांच्या निधनानंतर रुग्णालयाबाहेर सुरक्षा व्यवस्था वाढवण्यात आली असून, चाहते आणि मान्यवरांची मोठी गर्दी होत आहे.
भारतीय संगीतसृष्टीत आपल्या आवाजाने अजरामर ठसा उमटवणाऱ्या आशा भोसले यांच्या जाण्याने एक सुवर्णयुग संपले असून, त्यांच्या सुरांची परंपरा मात्र सदैव जिवंत राहणार आहे.
