पालकमंत्री गुलाबराव पाटील यांना निवेदन
आदिवासी टायगर सेनेची मागणी; घरकुल, कागदपत्रे, रोजगार व मूलभूत हक्कांबाबत ११ प्रमुख मुद्दे मांडले
जळगाव : आदिवासी समाजाच्या विविध गंभीर समस्यांकडे लक्ष वेधण्यासाठी आणि त्या तातडीने सोडविण्यासाठी जिल्हास्तरीय बैठक आयोजित करावी, अशी मागणी आदिवासी टायगर सेनेच्या वतीने करण्यात आली आहे. याबाबत १२ एप्रिल २०२६ रोजी पाडधी येथे पालकमंत्री तथा राज्याचे पाणीपुरवठा मंत्री Gulabrao Patil यांना सविस्तर निवेदन देण्यात आले. या निवेदनात आदिवासी समाजाच्या समस्या दिवसेंदिवस गंभीर होत असल्याचे नमूद करत जिल्हाधिकारी कार्यालय, जळगाव येथे पालकमंत्र्यांच्या उपस्थितीत सर्व संबंधित विभागांच्या वरिष्ठ अधिकाऱ्यांची तातडीची बैठक घेण्याची मागणी करण्यात आली आहे.
आदिवासी टायगर सेनेने निवेदनात एकूण ११ महत्त्वाच्या मागण्या मांडल्या आहेत. त्यामध्ये आदिवासी वस्त्यांमध्ये दफनभूमी उपलब्ध करून देणे व सातबारा उतारा देणे, जन्मनोंदणी अभावी आधार कार्ड व अन्य कागदपत्रे मिळत नसल्याने विशेष मोहिम राबविणे, बंद पडलेली आदिवासी शबरी घरकुल योजना पुन्हा सुरू करणे, तसेच नवीन रेशनकार्डधारकांना अन्नधान्य पुरवठा सुरळीत करण्याची मागणी करण्यात आली आहे.
याशिवाय, विविध शासकीय योजनांचा लाभ मिळण्यात येणाऱ्या अडचणी दूर करणे, अतिक्रमित जागांवर राहणाऱ्या आदिवासींना मालकी हक्क देणे, वनहक्क समित्या स्थापन करून वनजमिनींचे हक्क प्रदान करणे, स्थानिक पातळीवर रोजगार निर्मिती करणे आणि मच्छीमारीसाठी प्राधान्य देणे या मागण्यांचाही समावेश आहे.
तसेच, शाळाबाह्य मुलांसाठी प्रत्येक वस्तीत अंगणवाडी सुरू करणे, कागदपत्रे नसलेल्या नागरिकांना आरोग्य, शिक्षण व अन्नधान्य यांसारख्या मूलभूत हक्कांचा लाभ देण्यासाठी विशेष सवलती लागू करणे, तसेच भगवान वीर एकलव्य यांच्या मूर्ती स्थापनेसाठी परवानगी व आर्थिक मदत देण्याची मागणीही करण्यात आली आहे.
हे निवेदन देताना आदिवासी टायगर सेनेचे राज्य प्रवक्ता पंढरीनाथ मोरे यांच्यासह शांताराम रामा भील, विनोद मोरे, रविंद्र सोनवणे, भीमराव सोनवणे, चैत्राम सोनवणे, वासुदेव गायकवाड, विष्णू मोरे व अधिकार भील आदी कार्यकर्ते उपस्थित होते. या मागण्यांवर तातडीने सकारात्मक निर्णय घेऊन आदिवासी समाजाला न्याय द्यावा, अशी अपेक्षा यावेळी व्यक्त करण्यात आली.
