एनसीबी आणि पोलिसांची संयुक्त कारवाई; पुरवठा साखळीचा मोठा उलगडा होण्याची शक्यता
टिटवळा (प्रतिनिधी):
नार्कोटिक्स कंट्रोल ब्युरो (एनसीबी) आणि स्थानिक पोलिसांनी संयुक्त कारवाई करत टिटवळा परिसरात मोठ्या ड्रग्स रॅकेटचा भंडाफोड केला आहे. या कारवाईत तब्बल ₹५ कोटींपेक्षा अधिक किमतीचा एमडी (MD) ड्रग्स साठा जप्त करण्यात आला असून एका ३५ वर्षीय महिलेला अटक करण्यात आली आहे.
पोलिसांनी दिलेल्या माहितीनुसार, आरोपी महिलेच्या भाड्याच्या घरावर छापा टाकून सुमारे २ किलो ३०० ग्रॅमपेक्षा अधिक एमडी ड्रग्स हस्तगत करण्यात आले. यामध्ये एमडीएमए (MDMA) आणि ‘एमडी बटन’ या प्रकारांचा समावेश आहे. शनिवारी उशिरा रात्री पद्मावती सोसायटी परिसरात ही धडक कारवाई करण्यात आली.
ही कारवाई १५ एप्रिल रोजी उघडकीस आलेल्या दुसऱ्या एका ड्रग्स प्रकरणातून मिळालेल्या धागेदोऱ्यांवर आधारित होती. त्या प्रकरणातील आरोपीच्या चौकशीतून या महिलेचा सहभाग समोर आला. ती ड्रग्स पुरवठा साखळीतील महत्त्वाची कडी असल्याचा संशय तपास यंत्रणांनी व्यक्त केला आहे.
गुप्त माहितीच्या आधारे एनसीबी पथकाने कल्याण तालुका पोलिसांच्या मदतीने सापळा रचत आरोपीचा ठावठिकाणा शोधून काढला आणि तिच्या घरावर छापा टाकला. या छाप्यात मोठ्या प्रमाणावर अमली पदार्थ सापडल्याने परिसरात एकच खळबळ उडाली.
अटक करण्यात आलेली महिला मूळची नवी मुंबई येथील रहिवासी असून ती गेल्या दीड महिन्यांपासून टिटवळ्यात भाड्याने राहत होती. या कालावधीत ती स्थानिक स्तरावर ड्रग्स वितरणात सक्रिय होती का, याचा तपास सुरू आहे.
दरम्यान, या प्रकरणाचा विस्तार किती मोठा आहे, याचा शोध घेण्यासाठी तपास यंत्रणांनी चौकशीची व्याप्ती वाढवली आहे. या कारवाईमुळे मुंबई आणि ठाणे परिसरातील ड्रग्स नेटवर्कला मोठा धक्का बसल्याचे मानले जात असून, आणखी अटकांची शक्यता वर्तवली जात आहे.
