अयोध्येतील राम मंदिरात ‘एसी’ वेटिंग रूम आणि खास सुविधा

वाढत्या उष्णतेपासून रामभक्तांना मोठा दिलासा

अयोध्या : अयोध्येत सध्या उन्हाचा पारा वाढत असून, प्रभू श्रीरामाच्या दर्शनासाठी येणाऱ्या भाविकांना या भीषण उष्णतेचा त्रास होऊ नये यासाठी ‘श्री राम जन्मभूमी तीर्थ क्षेत्र ट्रस्ट’ने जय्यत तयारी केली आहे. भाविकांच्या सुखद दर्शनासाठी मंदिरात करण्यात आलेल्या विशेष सुविधा देण्यात आल्या आहेत. वातानुकूलित प्रतिक्षालये आणि विश्रामगृहेही सुरू करण्यात आली आहेत.

रामललाच्या दर्शनासाठी देशभरातून येणाऱ्या लाखो भाविकांना वाढत्या तापमानाचा फटका बसू नये, यासाठी मंदिर प्रशासनाने महत्त्वाचे पाऊल उचलले आहे. भाविकांच्या सुविधेसाठी मंदिरात आता वातानुकूलित (एसी) वेटिंग रूम कार्यान्वित करण्यात आले आहेत. दर्शनासाठी रांगेत उभे राहणाऱ्या भाविकांना उष्णतेपासून वाचवण्यासाठी मंदिर परिसरात ठिकठिकाणी या एसी वेटिंग रूम्स तयार करण्यात आल्या आहेत. यामुळे वयोवृद्ध आणि लहान मुलांचा प्रवास सुखकर होणार आहे.

इथे आरामदायी आसनव्यवस्था करण्यात आली आहे. सर्वच वेटिंग रूममध्ये भाविकांना बसण्यासाठी सोफे आणि आरामदायी खुर्च्यांची व्यवस्था करण्यात आली आहे, जेणेकरून थकलेल्या भाविकांना विश्रांती घेता येईल. उष्णतेमुळे शरीरातील पाण्याची पातळी कमी होऊ नये, यासाठी ठिकठिकाणी आरओ फिल्टरचे थंड पाणी उपलब्ध करून दिले आहे. भाविकांच्या पायांच्या संरक्षणासाठी ज्यूट कार्पेट अंठरण्यात आले आहेत. मंदिर परिसरात अनवाणी चालणाऱ्या भाविकांचे पाय जळू नयेत म्हणून संपूर्ण मार्गावर ज्यूटचे जाड कार्पेट टाकण्यात आले असून त्यावर सातत्याने पाण्याचा फवारा मारला जात आहे.

सावलीसाठी शेड
दर्शनासाठीच्या रांगेत भाविकांना थेट उन्हाचा त्रास होऊ नये म्हणून छताची व्याप्ती वाढवण्यात आली आहे.

ओआरएस आणि औषधे
डिहायड्रेशनचा त्रास झाल्यास भाविकांसाठी ओआरएसची पाकिटे आणि प्रथमोपचाराची व्यवस्थाही उपलब्ध आहे.

उन्हाळ्यात भाविकांची संख्या कमी होऊ नये आणि जे भक्त दर्शनासाठी येत आहेत त्यांना कोणतीही शारीरिक अडचण येऊ नये, याला आमचे सर्वोच्च प्राधान्य आहे, असे ट्रस्टने म्हटले आहे. वाढत्या उष्म्याचा विचार करता मंदिर प्रशासनाने केलेल्या या हायटेक आणि संवेदनशील सुविधांमुळे भाविकांकडून समाधान व्यक्त केले जात आहे. आता प्रभू श्रीरामाचे दर्शन केवळ भावपूर्णच नाही, तर आरामदायकही होणार आहे.