एकनाथ शिंदे यांच्या नेतृत्वाखाली पुढील १५-२० वर्षे राजकारण; विधानपरिषदेच्या उमेदवारीचीही घोषणा
मुंबई : गेल्या काही दिवसांपासून रंगलेल्या राजकीय चर्चांना पूर्णविराम देत प्रहार संघटनेचे नेते बच्चू कडू यांनी अखेर शिवसेना मध्ये अधिकृत प्रवेश केला. “धनुष्यबाण पुन्हा हाती घेत आहे,” असे स्पष्ट करत त्यांनी आपल्या नव्या राजकीय प्रवासाची दिशा जाहीर केली. यावेळी मुख्यमंत्री एकनाथ शिंदे यांनी बच्चू कडू यांच्या विधानपरिषदेच्या उमेदवारीचीही घोषणा केली.
अटी मान्य झाल्यानंतरच निर्णय
पक्षप्रवेशाच्या निर्णयामागे ठोस भूमिका असल्याचे बच्चू कडूंनी स्पष्ट केले.
“शिवसेनेनं आमचे सर्व मुद्दे मान्य केले आहेत. हमीभावातील सुधारणा, ‘लाडक्या बहिणी’ योजनेतील विधवा महिलांचा प्रश्न, तसेच दिव्यांग मंत्रालयाचे बळकटीकरण या मुद्द्यांवर सहमती झाल्यानंतरच मी हा निर्णय घेतला,” असे त्यांनी सांगितले.
शेतकरी आणि दिव्यांगांसाठी लढा कायम
“मी प्रामाणिकपणे काम करत राहीन. शिवसेनेची ताकद वाढवण्याबरोबरच शेतकरी आणि दिव्यांगांच्या हक्कांसाठी संघर्ष सुरूच राहील. त्यांच्या प्रश्नांवर कोणतीही तडजोड होणार नाही,” असा निर्धार त्यांनी व्यक्त केला.
‘आता पुढची १५-२० वर्षे शिवसेनेतच’
पक्षप्रवेशानंतर बच्चू कडूंनी भविष्यातील राजकीय दिशा स्पष्ट करत सांगितले,
“माझी सुरुवात शिवसेनेपासून झाली होती. आता पुन्हा त्या घरात आलो आहे. पुढील १५-२० वर्षे मी एकनाथ शिंदे यांच्या नेतृत्वाखालीच राजकारण करणार आहे.”
विधानपरिषदेसाठी उमेदवारी जाहीर
या प्रवेशावेळी एकनाथ शिंदे यांनी विधानपरिषद निवडणुकीसाठी बच्चू कडू आणि नीलम गोऱ्हे यांच्या नावांची घोषणा केली. त्यामुळे आगामी राजकीय समीकरणांमध्ये शिवसेनेची ताकद वाढणार असल्याचे संकेत मिळत आहेत.
राजकीय चर्चांना पूर्णविराम
गेल्या काही दिवसांपासून बच्चू कडूंच्या पक्षांतराच्या चर्चा रंगत होत्या. प्रहार संघटना शिवसेनेत विलीन होणार का, याबाबतही तर्कवितर्क लावले जात होते. अखेर आजच्या निर्णयाने या सर्व चर्चांना पूर्णविराम मिळाला आहे.
