पारोळा शहर हादरले; कृषी उत्पन्न बाजार समितीतील कारकूनाचा दुर्दैवी मृत्यू
पारोळा | प्रतिनिधी
पारोळा शहरातील राष्ट्रीय महामार्ग क्रमांक ५३ वर बुधवारी (दि. ६) सायंकाळी भीषण अपघात घडला. लेलँड मालवाहू वाहनाने दुचाकीला जोरदार धडक दिल्याने दुचाकीस्वाराचा जागीच मृत्यू झाला. या घटनेमुळे परिसरात हळहळ व्यक्त होत असून शहरात शोककळा पसरली आहे. मृत व्यक्तीचे नाव देविदास प्रल्हाद नाईक (वय ५३, रा. गोपाल नगर, पारोळा) असे असून ते पारोळा कृषी उत्पन्न बाजार समितीत कारकून म्हणून कार्यरत होते.
मिळालेल्या माहितीनुसार, देविदास नाईक हे त्यांच्या शाईन दुचाकीने (एमएच १९ इजे ५७४४) धुळे-जळगाव रोडने शहराकडे येत होते. यावेळी समोरून धुळ्याकडे जाणाऱ्या लेलँड मालवाहू वाहनाने (एमएच १९ सीवाय ३२८९) त्यांच्या दुचाकीला जबर धडक दिली. हा अपघात इतका भीषण होता की नाईक यांच्या डोक्याला गंभीर दुखापत झाली.
अपघातानंतर स्थानिक नागरिकांनी तातडीने मदतीस धाव घेत त्यांना रुग्णवाहिकेतून पारोळा कुटीर रुग्णालयात दाखल केले. मात्र, डॉक्टरांनी तपासणीअंती त्यांना मृत घोषित केले. या दुर्घटनेमुळे महामार्गावर काही काळ वाहतुकीची कोंडी निर्माण झाली होती.
या प्रकरणी नंदू जाधव यांनी पारोळा पोलीस ठाण्यात फिर्याद दाखल केली असून लेलँड वाहन चालक राजेंद्र बाबुराव शिंदे (रा. आसोदा, जि. जळगाव) याच्याविरोधात गुन्हा नोंद करण्यात आला आहे. पुढील तपास पोलीस कॉन्स्टेबल चंद्रशेखर सोनवणे करीत आहेत.
देविदास नाईक यांच्या निधनामुळे पारोळा कृषी उत्पन्न बाजार समिती परिसरात शोक व्यक्त करण्यात येत आहे. शांत, मनमिळावू आणि कर्तव्यदक्ष कर्मचारी म्हणून त्यांची ओळख होती. त्यांच्या पश्चात आई, पत्नी, एक मुलगा आणि एक मुलगी असा परिवार आहे. दरम्यान, त्यांच्यावर गुरुवारी दुपारी १२ वाजता मूळ गाव मालखेडा (ता. जामनेर) येथे अंत्यसंस्कार करण्यात येणार असल्याची माहिती नातेवाईकांनी दिली.
