प्रसारमाध्यमांच्या वृत्ताची दखल; नशिराबाद नगरपरिषदेकडून वाकी नदी स्वच्छता मोहिमेला धडाक्यात प्रारंभ

शहरातील नागरिकांच्या आरोग्याचा तसेच पावसाळ्यातील संभाव्य पूरस्थितीचा विचार करून नगरपरिषदेच्या आरोग्य विभागाने सकाळपासूनच नदीपात्रातील संवेदनशील भागांमध्ये स्वच्छता मोहीम राबवली. मन्यार मशीद परिसर, खिडकी वाडा परिसर आणि निमजाय माता मंदिर परिसर या महत्त्वाच्या ठिकाणी विशेष लक्ष केंद्रित करण्यात आले.

मोहीमेदरम्यान नदीपात्रात वाढलेली झाडे-झुडपे, गवत, प्लास्टिक कचरा तसेच अन्य घनकचरा हटविण्याचे काम युद्धपातळीवर करण्यात आले. अनेक ठिकाणी नदीच्या प्रवाहात अडथळा निर्माण करणारे घटक दूर करून पात्र मोकळे करण्यात आले. यामुळे पावसाळ्यात पाण्याचा निचरा सुरळीत होण्यास मदत होणार आहे.

नगरपरिषद प्रशासनाने सांगितले की, पावसाळ्यात नदीला पूर आल्यास पाण्याचा प्रवाह सुरळीत राहणे अत्यंत आवश्यक असते. नदीपात्रात साचलेला कचरा आणि वाढलेली झाडे-झुडपे यामुळे पाण्याचा मार्ग अडवला जातो. परिणामी पूरस्थिती निर्माण होण्याची शक्यता वाढते. त्याचबरोबर साचलेल्या घाणीमुळे डासांची उत्पत्ती होऊन विविध साथीचे आजार पसरण्याचा धोका निर्माण होतो. या सर्व बाबी लक्षात घेऊन ही स्वच्छता मोहीम राबविण्यात येत आहे.

स्वच्छता मोहिमेदरम्यान आरोग्य विभागातील कर्मचारी आणि स्वच्छता कर्मचाऱ्यांनी मोठ्या मेहनतीने नदीपात्रातील अडथळे दूर केले. त्यांच्या कामाचे नगराध्यक्ष योगेश पाटील यांनी कौतुक करत शहर स्वच्छतेसाठी प्रशासन सर्वतोपरी प्रयत्नशील असल्याचे सांगितले.

दरम्यान, नगरपरिषदेच्या वतीने नागरिकांना महत्त्वाचे आवाहन करण्यात आले आहे. नदीमध्ये प्लास्टिक, घरगुती कचरा, निर्माल्य किंवा इतर कोणत्याही प्रकारची घाण टाकू नये, असे आवाहन करण्यात आले. स्वच्छ आणि सुंदर शहर निर्माण करण्यासाठी नागरिकांचे सहकार्य अत्यावश्यक असल्याचे प्रशासनाने स्पष्ट केले.

शहराचे पर्यावरण संतुलित ठेवणे, पूरस्थिती टाळणे आणि नागरिकांचे आरोग्य सुरक्षित राखणे हा या मोहिमेचा मुख्य उद्देश असल्याचे नगरपरिषद प्रशासनाने सांगितले. भविष्यातही अशाच प्रकारच्या स्वच्छता मोहिमा सातत्याने राबविण्यात येणार असून नशिराबाद शहर अधिक स्वच्छ, सुंदर आणि आरोग्यदायी बनविण्यासाठी प्रशासन कटिबद्ध असल्याचा विश्वास यावेळी व्यक्त करण्यात आला.