धुळे ग्रामीणच्या टंचाईग्रस्त गावांना मोठा दिलासा, आमदार राम भदाणे यांच्या नियोजनाला यश
माजी जिल्हा परिषद अध्यक्ष मनोहर भदाणे यांच्या हस्ते जलपूजन करून पाण्याचा विसर्ग सुरू
धुळे (सुनील निकम) : धुळे ग्रामीण मतदारसंघातील पाणीटंचाईच्या समस्येवर प्रभावी उपाय म्हणून अक्कलपाडा धरणाचे आवर्तन रविवारी सकाळी सुरू करण्यात आले. वाढत्या उन्हामुळे निर्माण झालेल्या तीव्र पाणीटंचाईच्या पार्श्वभूमीवर धरणाचे दोन दरवाजे २५ सेंटीमीटरने उघडून ५०० क्युसेक वेगाने पाण्याचा विसर्ग करण्यात आला. माजी जिल्हा परिषद अध्यक्ष मनोहर भदाणे यांच्या हस्ते जलपूजन करून या आवर्तनाचा शुभारंभ करण्यात आला.
यावेळी बोलताना मनोहर भदाणे यांनी सांगितले की, पूर्वी नियोजनाअभावी अक्कलपाडा धरणाचे आवर्तन केव्हाही सोडले जात असे. त्यामुळे अनेक गावांमध्ये पाणीपुरवठ्याच्या समस्या निर्माण होत होत्या. मात्र यंदा जिल्हा प्रशासन आणि आमदार राम भदाणे यांनी तब्बल सहा महिन्यांपूर्वीच याचे नियोजन केले होते. २९ ऑक्टोबरलाच आवर्तन कधी सोडायचे याचा आराखडा तयार करण्यात आला होता. या प्री-प्लॅनिंगमुळे योग्य वेळी पाणी उपलब्ध होऊन नागरिकांना मोठा दिलासा मिळाला आहे.
या गावांना मिळणार मोठा फायदा
अक्कलपाडा धरणातून सोडण्यात आलेल्या पाण्याचा लाभ धुळे ग्रामीणमधील नेर, कुसुंबा, बिलाडी, वरखेडे, कुंडाणे, न्याहळोद, जापी, शिरडाणे, सातरणे, विश्वनाथ, सुकवड, मोहाडी (प्र. डांगरी), नूरनगर, अकलाड, मोराणे, मेहेरगाव, वार, कौठळ यांसह अनेक गावांना होणार आहे. तसेच अमळनेर आणि शिंदखेडा तालुक्यातील काही गावांनाही या आवर्तनाचा लाभ मिळणार आहे. त्यामुळे पिण्याच्या पाण्यावरील ताण मोठ्या प्रमाणात कमी होणार असून नागरिकांना दिलासा मिळणार आहे.
आमदार राम भदाणे यांची दूरदृष्टी
यावेळी माजी जिल्हा परिषद सदस्य तथा माजी सरपंच शंकरराव खलाणे यांनी आमदार राम भदाणे यांच्या नियोजनाचे कौतुक केले. उन्हाळ्यात पाणीटंचाई निर्माण होणार हे लक्षात घेऊन सहा महिन्यांपूर्वीच आवर्तनाचे नियोजन करण्यात आले होते. त्यानुसार प्रशासनाने योग्य वेळी निर्णय घेतल्याने ग्रामीण भागातील नागरिकांना मोठा फायदा झाला असल्याचे त्यांनी सांगितले.
मान्यवरांची उपस्थिती
या प्रसंगी कार्यकारी अभियंता देवेंद्र अग्रवाल, पाटबंधारे विभागाचे उपविभागीय अधिकारी मयूर परदेशी, अजिंक्य पाटील, कालवा निरीक्षक राकेश अहिरे, रवींद्र बोरसे यांच्यासह विविध गावांचे सरपंच, उपसरपंच, लोकप्रतिनिधी आणि ग्रामस्थ मोठ्या संख्येने उपस्थित होते.
ग्रामस्थांकडून समाधान व्यक्त
अक्कलपाडा धरणाचे आवर्तन सुरू झाल्याने ग्रामीण भागातील पिण्याच्या पाण्याचा प्रश्न काही प्रमाणात सुटणार असल्याची भावना ग्रामस्थांनी व्यक्त केली. वेळेवर केलेल्या नियोजनामुळे नागरिक आणि शेतकऱ्यांना मोठा दिलासा मिळाला असून प्रशासन व लोकप्रतिनिधींनी घेतलेल्या पुढाकाराचे ग्रामस्थांनी स्वागत केले आहे.
अक्कलपाडा आवर्तनाची ठळक वैशिष्ट्ये
दोन दरवाजे २५ सेंटीमीटरने उघडले
५०० क्युसेक वेगाने पाण्याचा विसर्ग
धुळे ग्रामीणसह अमळनेर व शिंदखेडा तालुक्यांना लाभ
सहा महिन्यांपूर्वीच आवर्तनाचे नियोजन
पिण्याच्या पाण्याच्या टंचाईवर मोठा दिलासा
नागरिक आणि पशुधनासाठी महत्त्वाचा निर्णय
