महत्त्वाचे फोटो-व्हिडिओ पोलिसांच्या ताब्यात; विविध अंगांनी तपास सुरू, रात्री उशिरापर्यंत तक्रार नोंदविण्याची प्रक्रिया
धुळे : चाळीसगाव रोड परिसरातील म्हाडाच्या इमारतीत एका महिलेला अनेक दिवसांपासून बेकायदेशीररीत्या डांबून ठेवल्याचा आरोप स्थानिक नागरिकांनी केल्याने परिसरात खळबळ उडाली आहे. या घटनेविरोधात संतप्त झालेल्या मिरजकर नगर परिसरातील शेकडो नागरिकांनी स्थानिक नगरसेवक व सामाजिक कार्यकर्त्यांसह चाळीसगाव रोड पोलीस ठाणे गाठत संबंधितांवर गुन्हा दाखल करण्याची मागणी केली.
स्थानिक नागरिकांच्या म्हणण्यानुसार, म्हाडा इमारतीतील चौथ्या मजल्यावरील एका सदनिकेत संबंधित महिला राहत होती. काही दिवसांपासून ती मदतीसाठी हाका मारत असल्याची माहिती नागरिकांनी दिली. या प्रकाराची माहिती पोलिसांना देण्यात आली होती. मात्र, तत्काळ कारवाई होत नसल्याची भावना व्यक्त करत नागरिकांनी पोलीस ठाण्यासमोर तीव्र नाराजी व्यक्त केली.
या प्रकरणात नागरिकांनी काही महत्त्वाचे फोटो आणि व्हिडिओ पोलिसांच्या ताब्यात दिले असून त्यामुळे तपासाला अधिक गती मिळण्याची शक्यता व्यक्त केली जात आहे. पोलिसांनी प्राप्त माहिती आणि उपलब्ध पुराव्यांच्या आधारे तपास सुरू केला आहे.
महिलेला खरोखरच बेकायदेशीररीत्या डांबून ठेवण्यात आले होते का, ती तेथे स्वतःच्या इच्छेने राहत होती का, तिच्यावर कोणत्याही प्रकारचा दबाव किंवा अत्याचार झाला होता का, तसेच या प्रकरणामागे अन्य काही कारणे अथवा कटकारस्थान आहे का, याचा शोध घेण्यासाठी पोलिसांनी विविध अंगांनी तपास सुरू केला आहे. याशिवाय इमारतीतील सीसीटीव्ही फुटेजची तपासणीही करण्यात येणार असल्याची माहिती मिळाली आहे.
घटनेची गंभीरता लक्षात घेता रात्री उशिरापर्यंत तक्रार नोंदविण्याची प्रक्रिया सुरू होती. पोलिसांनी कोणताही निष्कर्ष न काढता सर्व बाजूंची पडताळणी करून पुढील कायदेशीर कारवाई करण्यात येईल, असे सांगितले. दरम्यान, या प्रकरणामुळे परिसरात तणावाचे वातावरण निर्माण झाले असून नागरिकांमध्ये विविध चर्चांना उधाण आले आहे. पोलिसांच्या तपासानंतरच घटनेमागील सत्य परिस्थिती स्पष्ट होणार आहे.
यावेळी भाजपा नगरसेवक धीरज परदेशी, सामाजिक कार्यकर्त्या प्रभा परदेशी, प्रशांत माने, मिलिंद चौधरी, रविंद्र बोरसे, वैभव खोपडे, श्याम चौगुले, जिग्नेश फुलदेवरे, भूषण खैरनार, सागर पाटील, पंकज मराठे, चेतन शेळके, राकेश एरडावकर, संतोष बारी, आकाश बारी, चेतन धुळेकर, तेजस फुलदेवरे, नितीन चौधरी, विशाल मोरे, बेबीबाई माने, ज्योती फुलदेवरे, संगीता बारी, छाया पाटील यांच्यासह शेकडो नागरिक उपस्थित होते.
पोलिसांसमोर अनेक प्रश्न
महिला तेथे स्वतःच्या इच्छेने राहत होती की तिला बळजबरीने ठेवण्यात आले होते?
तिने मदतीसाठी नागरिकांशी संपर्क साधला होता का?
सीसीटीव्ही फुटेजमधून नेमके काय समोर येते?
महिलेवर कोणत्याही प्रकारचा अत्याचार किंवा दबाव टाकण्यात आला होता का?
या प्रकरणामागे अन्य कोणते कारण अथवा कटकारस्थान आहे का?
या सर्व प्रश्नांची उत्तरे पोलीस तपासानंतरच स्पष्ट होणार आहेत.
