घरफोडीनंतर ग्रामस्थांमध्ये संताप; रात्रीची गस्त वाढविण्यासह आरोपींना तातडीने अटक करण्याची मागणी
शहादा (संजय मोहिते) : नंदुरबार जिल्ह्यातील शहादा तालुक्यातील ब्राम्हणपुरी परिसरात भुरट्या चोरांनी पुन्हा एकदा धुमाकूळ घालत एका घरात लाखो रुपयांची घरफोडी केल्याची घटना समोर आली आहे. अज्ञात चोरट्यांनी घरातील रोख रक्कम, सोन्या-चांदीचे दागिने आणि इतर मौल्यवान वस्तूंवर डल्ला मारल्याने परिसरात भीती आणि अस्वस्थतेचे वातावरण निर्माण झाले आहे.
मिळालेल्या माहितीनुसार, घरातील सदस्य काही कामानिमित्त बाहेर गेले असताना चोरट्यांनी संधी साधून घराचे कुलूप तोडत आत प्रवेश केला. घरातील कपाटे आणि सामानाची उचकापाचक करत त्यांनी रोख रक्कम, दागदागिने आणि इतर मौल्यवान वस्तू लंपास केल्या. चोरीची घटना उघडकीस येताच ग्रामस्थांनी घटनास्थळी मोठी गर्दी केली आणि संताप व्यक्त केला.
या घटनेनंतर ब्राम्हणपुरीसह परिसरातील नागरिकांमध्ये सुरक्षिततेबाबत चिंता वाढली असून, रात्रीच्या वेळी नियमित आणि प्रभावी पोलीस गस्त वाढविण्याची मागणी जोर धरू लागली आहे. गेल्या काही काळात चोरीच्या घटनांमध्ये वाढ झाल्याचा दावा करत ग्रामस्थांनी पोलीस प्रशासनाच्या कार्यक्षमतेवरही प्रश्नचिन्ह उपस्थित केले आहे.
ग्रामस्थांनी या प्रकरणाचा सखोल तपास करून अज्ञात चोरट्यांचा तातडीने शोध घ्यावा, तसेच गावात सीसीटीव्ही यंत्रणा उभारणे, संशयित व्यक्तींवर लक्ष ठेवणे आणि नियमित गस्त घालणे यासारख्या उपाययोजना राबविण्याची मागणी केली आहे. घटनेची माहिती मिळताच पोलिसांनी घटनास्थळी धाव घेत पंचनामा केला असून, अज्ञात चोरट्यांविरुद्ध गुन्हा दाखल करण्याची प्रक्रिया सुरू करण्यात आली आहे. या प्रकरणाचा पुढील तपास पोलीस करीत आहेत.
दरम्यान, “परिसरातील वाढत्या चोरीच्या घटना रोखण्यासाठी पोलीस प्रशासनाने कठोर आणि प्रभावी पावले उचलली नाहीत, तर नागरिकांच्या रोषाला सामोरे जावे लागेल,” असा इशारा संतप्त ग्रामस्थांनी दिला आहे. त्यामुळे या घरफोडीचा छडा लावण्यात पोलीस कितपत यशस्वी ठरतात, याकडे संपूर्ण परिसराचे लक्ष लागले आहे.
