पिंपर्डे ग्रामपंचायतीतील वाद चिघळला; चौकशी व तात्काळ कारवाईची मागणी, अन्यथा तीव्र जनआंदोलनाचा इशारा

ग्रामसेविकेवर गंभीर आरोप • शिपायाला धमकी दिल्याचा दावा • सोशल मीडियावरील आक्षेपार्ह संदेशांमुळे संताप • बिरसा फायटर्सचे निवेदन • कारवाई न झाल्यास आंदोलनाचा इशारा

संजय मोहिते ।शहादा (प्रतिनिधी) : नंदुरबार जिल्ह्यातील शहादा तालुक्यातील पिंपर्डे ग्रामपंचायतीत ग्रामसेविकेविरोधातील तक्रारींमुळे नवीन वाद निर्माण झाला आहे. ग्रामसेविका श्रीमती दिपाली उगलमुगले यांच्या कार्यपद्धतीवर गंभीर आरोप करत त्यांना तात्काळ निलंबित करण्यात यावे, या मागणीसाठी बिरसा फायटर्स संघटना आक्रमक झाली असून शहादा पंचायत समितीच्या गटविकास अधिकाऱ्यांना निवेदन सादर करण्यात आले आहे. कारवाई न झाल्यास तीव्र जनआंदोलन छेडण्याचा इशाराही संघटनेने दिला आहे.

निवेदनानुसार, संबंधित ग्रामसेविका गेल्या काही महिन्यांपासून ग्रामपंचायत कार्यालयात नियमितपणे उपस्थित राहत नसल्याचा आरोप करण्यात आला आहे. त्यामुळे ग्रामस्थांची विविध शासकीय व प्रशासकीय कामे रखडल्याने नागरिकांमध्ये नाराजीचे वातावरण निर्माण झाल्याचे सांगण्यात आले आहे.

याशिवाय ग्रामपंचायत शिपाई दिनेश वाघ यांच्यावर खोटे आरोप करून त्यांना धमकावण्यात आल्याचा आरोपही निवेदनात करण्यात आला आहे. तसेच सर्वसामान्य नागरिक आणि कर्मचाऱ्यांशी उद्धट वर्तन केल्याचाही दावा करण्यात आला आहे. या आरोपांमुळे ग्रामपंचायत परिसरात तणावाचे वातावरण निर्माण झाले आहे.

दरम्यान, ग्रामसेविकेने शिपाई दिनेश वाघ यांच्याबाबत सोशल मीडियावर आक्षेपार्ह आणि अपमानास्पद भाषा वापरल्याचे काही संदेश व्हायरल झाल्याचा दावा बिरसा फायटर्स संघटनेने केला आहे. या प्रकारामुळे संबंधित कर्मचाऱ्याच्या प्रतिष्ठेला धक्का पोहोचल्याचे सांगत ग्रामस्थांनी तीव्र संताप व्यक्त केला आहे.

या संपूर्ण प्रकरणाची निष्पक्ष आणि सखोल चौकशी करून संबंधित ग्रामसेविकेवर तात्काळ प्रशासकीय कारवाई करण्यात यावी, अशी मागणी संघटनेने केली आहे. तसेच प्रशासनाने वेळेत योग्य निर्णय घेतला नाही, तर ग्रामस्थांना सोबत घेऊन व्यापक जनआंदोलन उभारण्यात येईल, असा इशाराही निवेदनाद्वारे देण्यात आला आहे.

याचबरोबर ग्रामपंचायत कर्मचारी दिनेश वाघ यांना न्याय मिळवून देण्यासाठी कर्मचारी संघटना पुढे येणार का, असा प्रश्नही स्थानिक स्तरावर उपस्थित केला जात आहे. या प्रकरणामुळे ग्रामपंचायत प्रशासन, कर्मचारी आणि ग्रामस्थांमध्ये चर्चेला उधाण आले आहे.

बिरसा फायटर्सचे राज्याध्यक्ष गोपाल भंडारी यांच्या मार्गदर्शनाखाली हे निवेदन देण्यात आले. यावेळी पेसा समिती अध्यक्ष गंगाराम पवार, दिनेश वाघ, श्रावण भील, ईश्वर भील, एकनाथ पावरा, शरद पवार, राहुल वाघ, प्रवीण ईशी, सागर वाघ, सागर पावरा यांच्यासह अनेक कार्यकर्ते आणि ग्रामस्थ उपस्थित होते.

आता या प्रकरणावर शहादा पंचायत समितीचे गटविकास अधिकारी कोणती भूमिका घेतात, चौकशीचे निष्कर्ष काय येतात आणि वादावर पडदा पडतो की आंदोलन अधिक तीव्र होते, याकडे संपूर्ण तालुक्याचे लक्ष लागले आहे.