रेड अलर्टच्या पार्श्वभूमीवर विद्यार्थ्यांच्या सुरक्षिततेला प्राधान्य; अंगणवाड्यांपासून उच्च माध्यमिक शाळांपर्यंत सर्व शैक्षणिक संस्था बंद, मात्र शिक्षक-कर्मचाऱ्यांना उपस्थिती बंधनकारक
विश्वास गायकवाड । रायगड | प्रतिनिधी
भारतीय हवामान विभागाने रायगड जिल्ह्यासाठी जारी केलेल्या रेड अलर्टच्या पार्श्वभूमीवर आणि जिल्ह्यात सुरू असलेल्या मुसळधार पावसामुळे जिल्हाधिकारी किशन जावळे यांनी सोमवार, ६ जुलै २०२६ रोजी जिल्ह्यातील सर्व शाळांना सुट्टी जाहीर केली आहे. विद्यार्थ्यांच्या सुरक्षिततेचा विचार करून हा निर्णय घेण्यात आला असून जिल्हाधिकारी कार्यालयाने याबाबत अधिकृत आदेश जारी केला आहे.
हवामान विभागाने ५ ते ७ जुलै या कालावधीत रायगड जिल्ह्यात काही ठिकाणी मुसळधार ते अति मुसळधार, तर तुरळक ठिकाणी अत्यंत मुसळधार पावसाचा इशारा दिला आहे. गेल्या पाच दिवसांपासून जिल्ह्यात सातत्याने पाऊस सुरू असून अनेक भागांमध्ये पाणी साचणे, रस्त्यांवर वाहतूक विस्कळीत होणे तसेच नदी-नाल्यांच्या पाणीपातळीत वाढ होण्याची शक्यता निर्माण झाली आहे.
या पार्श्वभूमीवर जिल्हा प्रशासनाने खबरदारीचा उपाय म्हणून जिल्ह्यातील सर्व अंगणवाड्या, प्राथमिक, माध्यमिक आणि उच्च माध्यमिक शाळा सोमवारसाठी बंद ठेवण्याचा निर्णय घेतला आहे. त्यामुळे हजारो विद्यार्थ्यांना आज शाळेत जावे लागणार नाही.
मात्र, सुट्टी जाहीर करण्यात आली असली तरी सर्व मुख्याध्यापक, शिक्षक आणि शिक्षकेत्तर कर्मचाऱ्यांनी कार्यालयीन वेळेत शाळेत उपस्थित राहणे बंधनकारक करण्यात आले आहे. तसेच आपत्ती व्यवस्थापन अधिनियम २००५ अंतर्गत स्थानिक प्रशासनाला आवश्यकतेनुसार मदत व सहकार्य करण्याचे निर्देशही देण्यात आले आहेत.
जिल्ह्यातील विविध तालुक्यांमध्ये गेल्या काही दिवसांपासून सुरू असलेल्या संततधार पावसामुळे परिस्थितीवर प्रशासनाचे बारकाईने लक्ष आहे. तहसीलदार आणि संबंधित इन्सिडंट कमांडर यांनी अतिवृष्टीचा संभाव्य धोका लक्षात घेऊन शाळांना सुट्टी जाहीर करण्याची शिफारस जिल्हाधिकाऱ्यांकडे केली होती. त्यानंतर परिस्थितीचा आढावा घेऊन हा निर्णय घेण्यात आला.
दरम्यान, जिल्हा प्रशासनाने पालक आणि नागरिकांना सतर्क राहण्याचे आवाहन केले आहे. अतिआवश्यक कामाशिवाय घराबाहेर पडू नये, नदी-नाले, धबधबे आणि पूरग्रस्त भागांपासून दूर राहावे तसेच प्रशासनाच्या सूचनांचे काटेकोर पालन करावे, असे आवाहन करण्यात आले आहे.
सततच्या पावसामुळे कोणतीही आपत्कालीन परिस्थिती उद्भवल्यास तातडीने स्थानिक प्रशासनाशी संपर्क साधण्याचेही आवाहन करण्यात आले असून जिल्हा प्रशासन परिस्थितीवर सतत लक्ष ठेवून असल्याचे स्पष्ट करण्यात आले आहे. विद्यार्थ्यांच्या सुरक्षिततेला सर्वोच्च प्राधान्य देत हा निर्णय घेण्यात आल्याने पालकांनी समाधान व्यक्त केले आहे.
