मास्टर कीने मोटारसायकली चोरणारा अट्टल चोर जेरबंद; चार चोरीच्या दुचाकी हस्तगत
पाचोरा गुन्हे शोध पथकाची धडक कारवाई; ₹१.२० लाखांचा मुद्देमाल जप्त, जिल्ह्यासह संभाजीनगरातील गुन्ह्यांची उकल
पाचोरा | प्रतिनिधी :
पाचोरा पोलीस ठाण्याच्या गुन्हे शोध पथकाने वाहन चोरीच्या गुन्ह्यांचा यशस्वी तपास करत मास्टर कीच्या साहाय्याने मोटारसायकली चोरणाऱ्या अट्टल चोरट्याला अटक केली आहे. आरोपीकडून चोरीच्या चार बजाज प्लॅटिना मोटारसायकली जप्त करण्यात आल्या असून, जप्त मुद्देमालाची एकूण किंमत ₹१ लाख २० हजार आहे.
जळगाव जिल्ह्यासह पाचोरा शहरात वाढत्या मोटारसायकल चोरीच्या घटनांच्या पार्श्वभूमीवर पोलीस अधीक्षक श्रीकांत धिवरे यांनी चोरीचे गुन्हे उघड करून आरोपींना तातडीने अटक करण्याच्या सूचना दिल्या होत्या. त्यानुसार पोलीस निरीक्षक राहुलकुमार पवार यांच्या मार्गदर्शनाखाली गुन्हे शोध पथकाने तपासाची चक्रे वेगाने फिरवली.
तपासादरम्यान मिळालेल्या गोपनीय माहितीनुसार अमोल राजेंद्र ढमाळे (वय २७, रा. नंदीचे खेडगाव, ता. पाचोरा, ह.मु. काळे नगर, जळगाव) हा जळगाव रोडलगत एका शेतातील शेडमध्ये लपून राहत असल्याचे निष्पन्न झाले. पोलिसांनी सापळा रचून त्याला ताब्यात घेतले. चौकशीत त्याने चार मोटारसायकली चोरी केल्याची कबुली दिली.
तपासात आरोपी मास्टर कीच्या साहाय्याने विशेषतः बजाज प्लॅटिना मोटारसायकली चोरी करत असल्याचे समोर आले. त्याच्याकडून जप्त करण्यात आलेल्या चारही दुचाकी भडगाव, पाचोरा आणि एमआयडीसी वाळूज (छत्रपती संभाजीनगर) पोलीस ठाण्यांच्या हद्दीतून चोरीस गेल्याचे उघड झाले.
या प्रकरणी भडगाव पोलीस ठाणे गुन्हा क्र. २३८/२०२६, पाचोरा पोलीस ठाणे गुन्हा क्र. ३४९/२०२६ व ३५०/२०२६ तसेच एमआयडीसी वाळूज पोलीस ठाणे गुन्हा क्र. ७१३/२०२६ अन्वये भारतीय न्याय संहिता (BNS) कलम ३०३(२) अंतर्गत गुन्हे दाखल आहेत.
ही उल्लेखनीय कारवाई पोलीस अधीक्षक श्रीकांत धिवरे, अपर पोलीस अधीक्षक अशोक नखाते आणि उपविभागीय पोलीस अधिकारी बापू रोहम यांच्या मार्गदर्शनाखाली पोलीस निरीक्षक राहुलकुमार पवार, सहाय्यक पोलीस निरीक्षक प्रदीप शेवाळे, पोलीस उपनिरीक्षक कृष्णा घायाळ, पोहेका विलास पाटील, श्रीकांत गायकवाड, उमेश पाटील तसेच पोलीस कॉन्स्टेबल योगेश पाटील, संदीप पाटील आणि हरीश परदेशी यांच्या पथकाने यशस्वीपणे पार पाडली.
