भंडाऱ्यात साडेतीन वर्षांच्या बालिकेवर अत्याचाराच्या प्रयत्नाचा संशय; संतप्त नागरिकांचा जिल्हा रुग्णालयाबाहेर ठिय्या
संशयित ताब्यात; वैद्यकीय तपासणी सुरू, रुग्णालयाबाहेर पोलिसांचा कडक बंदोबस्त
भंडारा | प्रतिनिधी
भंडारा शहरातील आंबेडकर वॉर्ड परिसरात गुरुवारी दुपारी घडलेल्या धक्कादायक घटनेमुळे संपूर्ण शहरात संतापाचे वातावरण निर्माण झाले आहे. साडेतीन वर्षांच्या बालिकेवर एका ३० वर्षीय युवकाने लैंगिक अत्याचाराचा प्रयत्न केल्याचा संशय व्यक्त करण्यात आला असून, पोलिसांनी संशयिताला ताब्यात घेतले आहे.
प्राथमिक माहितीनुसार, घटनेची माहिती मिळताच पोलिसांनी तातडीने कारवाई करत संशयिताला ताब्यात घेतले. त्याच्याविरुद्ध गुन्हा नोंदविण्याची प्रक्रिया सुरू असून, प्रकरणाचा सखोल तपास केला जात आहे.
दरम्यान, पोलिसांच्या ताब्यात असताना संशयिताने स्वतःला दुखापत करून घेतल्याची माहिती समोर आली. त्यानंतर त्याला उपचारासाठी जिल्हा शासकीय रुग्णालयात दाखल करण्यात आले.
प्राथमिक तपासात संशयित मानसिकदृष्ट्या अस्वस्थ असल्याचा संशय व्यक्त करण्यात आला असला, तरी याबाबतचा अंतिम निष्कर्ष वैद्यकीय तपासणी आणि तपास पूर्ण झाल्यानंतरच स्पष्ट होईल, असे पोलिसांनी सांगितले आहे.
पीडित बालिकेची वैद्यकीय तपासणी करण्यात येत असून, घटनास्थळाचा पंचनामा करून आवश्यक पुरावे जप्त करण्यात आले आहेत.
रुग्णालयाबाहेर तणावपूर्ण वातावरण
संशयितावर जिल्हा रुग्णालयात उपचार सुरू असल्याची माहिती मिळताच सायंकाळी मोठ्या संख्येने नागरिक रुग्णालयाबाहेर जमले. “आरोपीला आमच्या ताब्यात द्या” अशा घोषणा देत संतप्त नागरिकांनी निषेध व्यक्त केला. परिस्थिती नियंत्रणात ठेवण्यासाठी पोलिसांनी अतिरिक्त बंदोबस्त तैनात केला आणि रुग्णालय परिसरात कडक सुरक्षा व्यवस्था लागू केली.
जलद व निष्पक्ष तपासाची मागणी
या घटनेमुळे बालकांच्या सुरक्षेचा प्रश्न पुन्हा ऐरणीवर आला आहे. प्रकरणाचा जलदगतीने व निष्पक्ष तपास करून दोषी आढळल्यास कठोर कायदेशीर कारवाई करावी, अशी मागणी नागरिकांकडून करण्यात येत आहे.
