ध्वजवंदनाच्या दिवशीच ग्रामपंचायत परिसरात अस्वच्छता!

वडगाव बुद्रुक ग्रामपंचायतीच्या कारभारावर प्रश्नचिन्ह; दोषी अधिकारी-कर्मचाऱ्यांवर तात्काळ कारवाईची स्वप्नील कुमावत यांची मागणी

वडगाव बुद्रुक : स्वातंत्र्य दिनाच्या पवित्र दिवशीच वडगाव बुद्रुक ग्रामपंचायत कार्यालय परिसरात अस्वच्छता आढळल्याचा आरोप करण्यात आल्याने ग्रामपंचायत प्रशासनाच्या कार्यपद्धतीवर प्रश्नचिन्ह निर्माण झाले आहे. याप्रकरणी रहिवासी स्वप्नील कुमावत यांनी पंचायत समिती, पाचोरा येथील गटविकास अधिकारी तसेच जिल्हा परिषद प्रशासनाकडे लेखी तक्रार दाखल करून या प्रकरणाची चौकशी करून दोषींवर तातडीने कारवाई करण्याची मागणी केली आहे.

तक्रारीनुसार, १५ ऑगस्ट २०२६ रोजी ग्रामपंचायत कार्यालय परिसराची आवश्यक साफसफाई करण्यात आलेली नव्हती. कार्यालयासमोर कचरा व घाण साचलेली होती, तर मुख्य प्रवेशद्वाराजवळ गाजरगवतासह इतर गवत मोठ्या प्रमाणात वाढल्याचे तक्रारीत नमूद करण्यात आले आहे. त्यामुळे स्वातंत्र्य दिनाच्या ध्वजवंदन कार्यक्रमासाठी आलेल्या नागरिकांना अस्वच्छ वातावरणाचा सामना करावा लागल्याचा आरोप करण्यात आला आहे.

राष्ट्रीय सणाच्या दिवशी अस्वच्छता का?

स्वातंत्र्य दिन हा देशाच्या दृष्टीने अत्यंत महत्त्वाचा राष्ट्रीय सण आहे. या दिवशी शासकीय व ग्रामपंचायत कार्यालय परिसर स्वच्छ ठेवणे, ध्वजवंदनाच्या ठिकाणी स्वच्छता व आवश्यक व्यवस्था करणे ही प्रशासनाची प्राथमिक जबाबदारी आहे. मात्र, ध्वजवंदनाच्या दिवशीच ग्रामपंचायत परिसरात कचरा आणि वाढलेले गवत दिसून आल्याने प्रशासनाच्या नियोजनावरच प्रश्न उपस्थित होत आहेत.

अशा अस्वच्छ वातावरणात राष्ट्रीय ध्वजाला मानवंदना देण्याचा कार्यक्रम घेण्यात आल्याने राष्ट्रीय सणाच्या गांभीर्याला आणि राष्ट्रध्वजाच्या सन्मानाला बाधा पोहोचल्याचा आरोप स्वप्नील कुमावत यांनी केला आहे.

जबाबदारांवर कारवाईची मागणी

या संपूर्ण प्रकाराची प्रशासनाने तातडीने चौकशी करावी. ग्रामपंचायत परिसराची स्वच्छता राखण्यात कर्तव्यात कसूर झाली असल्याचे आढळल्यास संबंधित अधिकारी, कर्मचारी तसेच जबाबदार लोकप्रतिनिधींवर नियमानुसार प्रशासकीय कारवाई करण्यात यावी, अशी मागणी कुमावत यांनी केली आहे.

ग्रामपंचायत परिसर स्वच्छ ठेवण्याबाबत नियमितपणे आवश्यक उपाययोजना करण्यात येतात का, स्वातंत्र्य दिनाच्या कार्यक्रमापूर्वी स्वच्छतेची पाहणी करण्यात आली होती का आणि संबंधित कर्मचाऱ्यांनी आपली जबाबदारी पार पाडली होती का, याचीही चौकशी करण्याची मागणी करण्यात आली आहे.

प्रशासनाच्या भूमिकेकडे ग्रामस्थांचे लक्ष

राष्ट्रीय सणाच्या दिवशी ग्रामपंचायत परिसरात अस्वच्छता असल्याच्या तक्रारीची पंचायत समिती व जिल्हा परिषद प्रशासनाकडून काय दखल घेतली जाते, चौकशी कधी केली जाते आणि दोषी आढळणाऱ्यांवर कोणती कारवाई होते, याकडे वडगाव बुद्रुक ग्रामस्थांचे लक्ष लागले आहे.