“आपल्याजवळ जे नाही त्याची खंत करण्यापेक्षा, जे आहे त्यात समाधान मानल्यास आपण सर्वात श्रीमंत!”

मुकुंद गोसावी यांचा संदेश; श्री समर्थ कृपा अपंग महिला बचत गटातर्फे दिव्यांग गणेश काजळे यांना तीन चाकी सायकल भेट

जळगाव | दिनांक १८/०८/२०२६ :  आपल्याकडे असलेली एखादी वस्तू स्वतःसाठी उपयोगी नसली, तरी ती एखाद्या गरजू व्यक्तीच्या आयुष्यात मोठा बदल घडवू शकते. आपल्या गरजेपेक्षा अधिक असलेली वस्तू गरजू व्यक्तीला देणे हे केवळ दान नसून माणुसकीचे आणि पुण्यकर्माचे प्रतीक आहे, असा प्रेरणादायी संदेश दिव्यांग मित्र तथा सेवाभावी व्यक्तिमत्त्व मुकुंद गोसावी यांनी दिला.

श्री समर्थ कृपा अपंग महिला बचत गटाच्या वतीने चाळीसगाव येथील दिव्यांग गणेश काजळे यांना तीन चाकी दिव्यांग सायकल भेट देण्यात आली. जळगाव येथील सिंधी कॉलनी रोडवरील शासकीय दिव्यांग संमिश्र केंद्रात हा संवेदनशील उपक्रम पार पडला. मुकुंद गोसावी यांच्या हस्ते गणेश काजळे यांना सायकल प्रदान करण्यात आली.

गरजू व्यक्तीसाठी पुढे आला मदतीचा हात

चाळीसगाव येथील गणेश काजळे यांना पोलिओ आजारामुळे पायांमध्ये अपंगत्व आले असून, त्यांची आर्थिक परिस्थितीही हलाखीची आहे. दैनंदिन चलनवलनासाठी त्यांना दिव्यांगांसाठी उपयुक्त तीन चाकी सायकलची आवश्यकता होती. यासाठी त्यांनी दिव्यांगांसाठी सातत्याने सकारात्मक आणि सेवाभावी कार्य करणारे मुकुंद गोसावी यांच्याशी संपर्क साधला.

दरम्यान, जळगाव येथील गणेश पाटील यांना नुकतीच तीन चाकी सायकल मिळाली होती. गरजू व्यक्तीला तिची अधिक आवश्यकता असल्याचे लक्षात आल्यानंतर मुकुंद गोसावी यांनी गणेश पाटील यांच्याशी संपर्क साधून ही सायकल गरजू व्यक्तीला देता येईल का, अशी विचारणा केली. गणेश पाटील यांनी क्षणाचाही विलंब न करता सकारात्मक प्रतिसाद दिला.

त्यानंतर गणेश पाटील यांनी चाळीसगाव येथील गणेश काजळे यांना ही तीन चाकी सायकल देण्याचा निर्णय घेतला. त्यांच्या या संवेदनशीलतेचे यावेळी कौतुक करण्यात आले.

“मनाने आणि हृदयाने आपण सक्षम आहोत”

यावेळी मुकुंद गोसावी म्हणाले, “आपल्या जवळ जे नाही त्याची खंत करण्यापेक्षा जे आहे त्यात समाधान मानल्यास आपण सर्वात श्रीमंत होतो. आपल्या शरीराचा एखादा भाग कमी असला, तरी आपण हृदयाने आणि मनाने सशक्त व सुदृढ आहोत. समाजाला प्रेरणा देणारे कार्य करून आपण इतरांपेक्षा कुठेही कमी नाही, हे सिद्ध करू शकतो.”

गरजू दिव्यांग व्यक्तीला मदतीचा हात देणाऱ्या गणेश पाटील यांच्या कार्याचे त्यांनी विशेष कौतुक केले. स्वतःकडे उपलब्ध असलेली वस्तू दुसऱ्याच्या उपयोगी पडावी, या भावनेतून करण्यात आलेली मदत ही समाजासाठी प्रेरणादायी असल्याचेही त्यांनी नमूद केले.

संवेदनशील उपक्रमाला विविध स्तरांतून सहकार्य

या वेळी गणेश पाटील, आशा पाटील, दत्तात्रय महाजन तसेच शासकीय दिव्यांग संमिश्र केंद्रातील दिव्यांग विद्यार्थी उपस्थित होते.

या संवेदनशील उपक्रमासाठी स्वयंदीपच्या मीनाक्षीताई निकम तसेच जिल्हा दिव्यांग पुनर्वसन केंद्राचे एस. पी. गणेशकर यांचे मार्गदर्शन लाभले. तसेच सचिन पाटील, किशोर नेवे, जितेंद्र पाटील आणि प्रवीण भोई यांचे सहकार्य लाभले.

दिव्यांग व्यक्तींना केवळ सहानुभूती न देता त्यांना स्वावलंबी होण्यासाठी आवश्यक साधने आणि संधी उपलब्ध करून देणे, हीच खरी सामाजिक बांधिलकी असल्याचा संदेश या उपक्रमातून देण्यात आला.