पहाण येथे अखंड हरिनाम सप्ताहाचे ५१वे वर्ष; बुधवारपासून भक्तिमय सोहळ्यास प्रारंभ

पहाण येथे अखंड हरिनाम सप्ताहाचे ५१वे वर्ष; बुधवारपासून भक्तिमय सोहळ्यास प्रारंभ

हनुमान मंदिरात आठवडाभर प्रवचन, हरिपाठ व हरिकीर्तनाची मेजवानी; २ सप्टेंबरला काल्याचे कीर्तन, महाप्रसाद व पालखी सोहळा

पहाण, ता. पाचोरा | प्रतिनिधी :
पहाण येथे ग्रामस्थ मंडळी व भजनी मंडळाच्या वतीने गेल्या ५१ वर्षांपासून सुरू असलेल्या अखंड हरिनाम (कीर्तन) सप्ताहाला बुधवार, दि. २६ ऑगस्ट २०२६ पासून प्रारंभ होत आहे. हनुमान मंदिर येथे दि. २६ ऑगस्ट ते २ सप्टेंबर या कालावधीत विविध धार्मिक व आध्यात्मिक कार्यक्रमांचे आयोजन करण्यात आले असून, सप्ताहानिमित्त गावात भक्तिमय वातावरण निर्माण होणार आहे.

सप्ताहादरम्यान दररोज सायंकाळी ४ वाजता प्रवचन, सायंकाळी ६ ते ७ हरिपाठ आणि रात्री ९ ते ११ हरिकीर्तन असे विविध कार्यक्रम होणार आहेत. परिसरातील भाविकांनी मोठ्या संख्येने सहभागी होऊन या धार्मिक सोहळ्याचा लाभ घ्यावा, असे आवाहन आयोजकांच्या वतीने करण्यात आले आहे.

विविध कीर्तनकारांची उपस्थिती

सप्ताहात दररोज नामवंत कीर्तनकारांचे कीर्तन होणार आहे. बुधवार, २६ ऑगस्ट रोजी ह.भ.प. ज्ञानेश्वर माऊली बेलदारवाडी, गुरुवार, २७ ऑगस्ट रोजी कु. ह.भ.प. तेजस्विनी दीदी, पहुरी, शुक्रवार, २८ ऑगस्ट रोजी ह.भ.प. योगेश महाराज, पाचोरा, तर शनिवार, २९ ऑगस्ट रोजी ह.भ.प. बाळकृष्ण महाराज, त्र्यंबकेश्वर यांचे कीर्तन होणार आहे.

रविवार, ३० ऑगस्ट रोजी ह.भ.प. सावता महाराज, मोहाडी, सोमवार, ३१ ऑगस्ट रोजी ह.भ.प. रेवण महाराज, काळेगाव हिंगणा, मंगळवार, १ सप्टेंबर रोजी ह.भ.प. नारायण महाराज, भडगावकर यांचे कीर्तन होणार आहे. बुधवार, २ सप्टेंबर रोजी ह.भ.प. कोमल महाराज, खेडीभोकर यांच्या काल्याच्या कीर्तनाने सप्ताहाची सांगता होणार आहे.

सांगता दिनी विविध धार्मिक कार्यक्रम

बुधवार, २ सप्टेंबर रोजी पहाटे ५ वाजता काकड आरती, सकाळी ९ वाजता काल्याचे कीर्तन आणि त्यानंतर सकाळी ११ वाजता महाप्रसादाचे आयोजन करण्यात आले आहे. भाविकांच्या आगमनापर्यंत महाप्रसादाचा कार्यक्रम सुरू राहणार आहे.

यावर्षीच्या महाप्रसादाचे मानकरी पुणेस्थित व्यावसायिक व पहाण गावचे रहिवासी श्री. विठ्ठल रामदास पाटील आहेत.

सांगता दिनी सायंकाळी गावातून पालखी फेरी काढण्यात येणार असून, त्यानंतर हनुमान मंदिराजवळ भजन व भारूडाचा कार्यक्रम होणार आहे. या धार्मिक व सांस्कृतिक कार्यक्रमानंतर ५१व्या अखंड हरिनाम सप्ताहाची सांगता करण्यात येणार आहे.

पंचक्रोशीतील भाविकांना उपस्थितीचे आवाहन

अखंड हरिनाम सप्ताहाच्या माध्यमातून गावात भक्ती, अध्यात्म, सामाजिक एकोपा आणि संस्कारांची परंपरा जपली जात आहे. नोकरीनिमित्त बाहेरगावी असलेले ग्रामस्थ, प्रतिष्ठित नागरिक, इष्ट-मित्र परिवार तसेच पंचक्रोशीतील भाविकांनी सहकुटुंब-सहपरिवार या सोहळ्यास उपस्थित राहून कार्यक्रमाची शोभा वाढवावी, असे नम्र आवाहन समस्त ग्रामस्थ मंडळी व पंचक्रोशी, पहाण यांच्या वतीने करण्यात आले आहे.

जय श्रीराम!