‘हर हर महादेव’च्या गजराने त्रिकालेश्वर मंदिर दुमदुमले; श्रावणाच्या सांगतेला हजारो भाविकांची मांदियाळी
श्रीराम सेना फाउंडेशनतर्फे भव्य महाप्रसादाचे आयोजन; ‘प्रति अमरनाथ’ देखाव्याने वेधले भोलेभक्तांचे लक्ष
धुळे : पवित्र श्रावण महिन्याच्या शेवटच्या दिवशी ‘हर हर महादेव’च्या जयघोषाने शहरातील साईप्रसाद कॉलनी येथील त्रिकालेश्वर महादेव मंदिर परिसर भक्तिमय झाला. श्रावणाच्या सांगतेनिमित्त महादेवाच्या दर्शनासाठी आणि महाप्रसादाचा लाभ घेण्यासाठी हजारो भाविकांनी मंदिर परिसरात गर्दी केली होती.
श्रीराम सेना फाउंडेशनचे संस्थापक अध्यक्ष विकी गोयर आणि सामाजिक कार्यकर्ते सागर परदेशी यांच्या वतीने भव्य महाप्रसादाचे आयोजन करण्यात आले होते. भाजपा महानगराध्यक्ष गजेंद्र अंपळकर यांच्यासह विविध मान्यवरांच्या हस्ते महादेवाची महाआरती करण्यात आली. त्यानंतर महाप्रसादाला सुरुवात झाली. हजारो भाविकांनी या महाप्रसादाचा लाभ घेतला.
‘प्रति अमरनाथ’ देखाव्याने वेधले लक्ष
यंदाच्या आयोजनाचे विशेष आकर्षण ठरले ते ‘प्रति अमरनाथ’च्या देखाव्याचे. अमरनाथच्या पवित्र वातावरणाची अनुभूती देणाऱ्या या देखाव्याने भोलेभक्तांचे विशेष लक्ष वेधून घेतले. देखावा पाहण्यासाठी भाविकांनी मोठी गर्दी केली होती.
श्रावण महिन्याला हिंदू धर्मात विशेष महत्त्व असून, या काळात भगवान महादेवाच्या उपासनेला विशेष स्थान आहे. त्यामुळे श्रावणाच्या शेवटच्या दिवशी त्रिकालेश्वर महादेव मंदिरात दर्शनासाठी सकाळपासूनच भाविकांची गर्दी पाहायला मिळाली.
भजन, जयघोषाने परिसर झाला भक्तिमय
‘हर हर महादेव’च्या जयघोषासह महादेवाच्या भक्तिगीतांनी संपूर्ण परिसर दुमदुमून गेला होता. भाविकांनी मनोभावे महादेवाचे दर्शन घेतले आणि त्यानंतर महाप्रसादाचा लाभ घेतला.
श्रीराम सेनेचे उत्कृष्ट नियोजन, ‘प्रति अमरनाथ’चा आकर्षक देखावा आणि भोलेभक्तांची मोठी उपस्थिती यामुळे मंदिर परिसराला भक्तिमय आणि उत्साहाचे स्वरूप प्राप्त झाले. आयोजनाचे नियोजन आणि व्यवस्थेबद्दल उपस्थित मान्यवरांनी आयोजकांचे कौतुक केले.
मान्यवरांची मोठ्या संख्येने उपस्थिती
या प्रसंगी भाजपा महानगराध्यक्ष गजेंद्र अंपळकर, श्रीराम सेनेचे संस्थापक अध्यक्ष विकी गोयर, सागर परदेशी, प्रसिद्ध उद्योजक पराग अहिरे, बबन थोरात, किरण जोंधळे, विकी परदेशी, नगरसेवक रोहित चांदोडे, पापा गोयर, आकाश परदेशी यांच्यासह विविध क्षेत्रातील मान्यवर आणि असंख्य शिवभक्त मोठ्या संख्येने उपस्थित होते.
‘हर हर महादेव’च्या जयघोषाने झालेल्या या भक्तिमय सोहळ्याने श्रावण महिन्याची सांगता उत्साहात आणि धार्मिक वातावरणात झाली.
