नशिराबादपुरतीच प्लास्टिकबंदी का? संपूर्ण जळगाव जिल्ह्यात कठोर अंमलबजावणी करा!

प्र. नगराध्यक्ष पंकज महाजन यांची जिल्हाधिकाऱ्यांकडे निवेदनाद्वारे मागणी; महिनाभरात कारवाई न झाल्यास १७ ते १९ नोव्हेंबरदरम्यान लाक्षणिक उपोषणाचा इशारा

नशिराबाद, जि. जळगाव | प्रतिनिधी

जळगाव जिल्ह्यात प्लास्टिकबंदीच्या नियमांची समान आणि कठोर अंमलबजावणी करण्याची मागणी आता जोर धरू लागली आहे. नशिराबाद नगरपरिषदेने शहरात प्लास्टिकबंदीची अंमलबजावणी सुरू केली असताना, जिल्ह्यातील इतर भागांतही प्रतिबंधित प्लास्टिकचे उत्पादन, साठवणूक आणि विक्री रोखण्यात यावी, अशी मागणी नशिराबाद नगरपरिषदेचे प्रभारी नगराध्यक्ष पंकज शामकांत महाजन यांनी जिल्हाधिकाऱ्यांकडे निवेदनाद्वारे केली आहे. प्रशासनाने महिनाभरात ठोस कारवाई न केल्यास तीन दिवसांचे लाक्षणिक उपोषण करण्याचा इशाराही त्यांनी दिला आहे.

नशिराबादमध्ये १७ सप्टेंबरपासून कारवाई

नशिराबाद नगरपरिषदेने १७ सप्टेंबर २०२६ पासून शहरात प्रतिबंधित प्लास्टिक पिशव्या आणि एकदाच वापरल्या जाणाऱ्या प्लास्टिकविरोधात कारवाई सुरू केली आहे. यासोबतच दवंडी आणि बैठकींच्या माध्यमातून नागरिक व व्यापाऱ्यांमध्ये जनजागृती करण्यात आली आहे.

मात्र, तपासणीदरम्यान काही व्यापाऱ्यांनी या कारवाईबाबत नाराजी व्यक्त केली. नशिराबादमध्येच नियमांची अंमलबजावणी होत असताना जिल्ह्यातील इतर भागांत प्रतिबंधित प्लास्टिकचे उत्पादन आणि विक्री सुरू असल्यास स्थानिक व्यापाऱ्यांवरच कारवाई का, असा सवाल त्यांनी उपस्थित केल्याचे निवेदनात नमूद करण्यात आले आहे.

जिल्हाभर एकसमान कारवाईची मागणी

प्लास्टिकबंदीचे नियम केवळ एका शहरापुरते मर्यादित न राहता संपूर्ण जिल्ह्यात समान पद्धतीने राबविण्यात यावेत, अशी भूमिका पंकज महाजन यांनी मांडली आहे. जिल्ह्यात प्रतिबंधित प्लास्टिकचे उत्पादन, साठवणूक आणि विक्री सुरू असल्यास संबंधित यंत्रणांनी त्यावर नियंत्रण आणावे, अशी मागणी त्यांनी केली आहे.

यासाठी जिल्हाधिकारी यांनी महानगरपालिका आयुक्त, जिल्हा परिषद मुख्य कार्यकारी अधिकारी आणि जिल्ह्यातील सर्व नगरपरिषदांच्या मुख्याधिकाऱ्यांना आवश्यक त्या सक्त सूचना द्याव्यात. पुढील महिनाभरात प्रतिबंधित प्लास्टिकविरोधात प्रभावी कारवाई करून त्याचे उत्पादन, साठवणूक आणि विक्री रोखावी, अशी मागणी निवेदनातून करण्यात आली आहे.

कारवाई न झाल्यास तीन दिवस उपोषण

प्रशासनाने महिनाभरात ठोस पावले उचलली नाहीत, तर १७ ते १९ नोव्हेंबर २०२६ या कालावधीत जिल्हाधिकारी कार्यालयासमोर किंवा जळगाव येथील जी.एस. ग्राउंडवर तीन दिवसांचे लाक्षणिक उपोषण करण्यात येईल, असा इशारा पंकज महाजन यांनी दिला आहे.

प्लास्टिक प्रदूषणामुळे पर्यावरणावर होणारे दुष्परिणाम रोखण्यासाठी प्रतिबंधित प्लास्टिकबंदीची प्रभावी अंमलबजावणी आवश्यक आहे. त्यामुळे प्रशासनाने या मागणीची दखल घेऊन जिल्हाभर एकसमान कारवाई करावी आणि पर्यावरण संवर्धनासाठी ठोस पावले उचलावीत, असे आवाहन त्यांनी केले आहे.