परभणीच्या उड्डाणपुलावर दररोज वाहतूक कोंडी; वाहनांच्या लांबच लांब रांगा!

सायंकाळी आणि रात्रीच्या वेळी वाहनधारकांची मोठी कसरत; वाहतूक व्यवस्थापनाचा प्रश्न ऐरणीवर, कायमस्वरूपी उपाययोजनेची मागणी

परभणी, दि. १४ (प्रतिनिधी – रामचंद्र अन्नदाते) :

परभणी शहरातील उड्डाणपुलावर दररोज होणाऱ्या वाहतूक कोंडीमुळे वाहनधारक अक्षरशः त्रस्त झाले आहेत. विशेषतः सायंकाळी आणि रात्रीच्या वेळी उड्डाणपुलावर वाहनांची मोठी गर्दी होत असून, दुचाकी, चारचाकी तसेच अवजड वाहनांच्या लांबच लांब रांगा लागत आहेत. त्यामुळे या मार्गावरून प्रवास करणाऱ्या नागरिकांना मोठ्या गैरसोयीचा सामना करावा लागत आहे.

तासन्तास कोंडीत अडकतात वाहनधारक

उड्डाणपुलावरून प्रवास करताना अनेक वाहनधारकांना बराच वेळ वाहतूक कोंडीत अडकून पडावे लागत आहे. परिणामी नागरिकांचा मौल्यवान वेळ वाया जात असून, दैनंदिन कामकाजावरही त्याचा परिणाम होत आहे. शहरातील वाहनांची वाढती संख्या, अवजड वाहनांची वर्दळ आणि वाहतुकीचे अपुरे नियोजन ही कोंडी वाढण्यामागील प्रमुख कारणे असल्याचे वाहनधारकांचे म्हणणे आहे.

अपघाताचा धोकाही वाढला

दररोजच्या वाहतूक कोंडीमुळे केवळ वाहनधारकच नव्हे, तर प्रवाशांनाही मनस्ताप सहन करावा लागत आहे. कोंडीतून मार्ग काढण्याच्या प्रयत्नात वाहनांची एकमेकांना ओलांडण्याची धडपड सुरू असते. त्यामुळे अपघात होण्याची शक्यताही नाकारता येत नाही. विशेषतः गर्दीच्या वेळेत परिस्थिती अधिक गंभीर होत असल्याने वाहतूक व्यवस्थापनाचा प्रश्न ऐरणीवर आला आहे.

वाहतूक पोलिसांची नियुक्ती करण्याची मागणी

उड्डाणपुलावरील वाहतुकीचे योग्य नियोजन करावे, गर्दीच्या वेळेत वाहतूक पोलिसांची नियुक्ती करावी आणि अवजड वाहनांच्या वर्दळीचे नियमन करावे, अशी मागणी वाहनधारकांकडून होत आहे. केवळ तात्पुरत्या उपाययोजनांऐवजी या समस्येवर कायमस्वरूपी तोडगा काढण्यासाठी संबंधित प्रशासनाने तातडीने लक्ष घालावे, अशी अपेक्षा नागरिक व्यक्त करीत आहेत.