मुंबई : भारतात आंब्याला ‘फळांचा राजा’ असे म्हटले जात हे आपल्या सर्वांनाच माहित आहे. कारण त्याची चव, सुगंध आणि रसाने परिपूर्ण असलेले आंबा हे फळ आहे. उन्हाळा सुरू होताच बाजारपेठा आंब्यांनी भरून जातात. भारतात तुम्हाला आंब्याच्या 1500 हून अधिक जाती आहेत, त्यापैकी काही जगभरात लोकप्रिय आहेत. पण तुम्हाला महित आहे का की जगात असा एक आंबा आहे ज्याची किंमत लाखो रुपये असू शकते? हे खूप ऐकायला खूप आश्चर्यकारक असले तरी ते अगदी खरे आहे. होय ‘मियाझाकी आंबा’ नावाची आंब्याची एक विशेष जात आहे आणि त्याची किंमत लोकांना चकित करते.
हा आंबा केवळ त्याच्या किमतीमुळेच नव्हे, तर त्याच्या अद्वितीय रंग, चव आणि गुणवत्तेमुळेही ओळखला जातो. चला तर मग आजच्या लेखात आपण जगातील सर्वात महागड्या आंब्याबद्दल जाणून घेणार आहोत. तसेच तो इतका खास आणि इतका मौल्यवान का आहे हे देखील आपण जाणून घेणार आहोत.
जगातील सर्वात महागडा आंबा कुठे आढळतो?
मियाझाकी आंब्याची कहाणी त्याच्या चवीइतकीच आकर्षक आहे. जपानच्या मियाझाकी प्रांतात पिकणाऱ्या या आंब्याची लागवड अत्यंत काळजीपूर्वक केली जाते. लागवडीच्या प्रक्रियेमध्ये तापमान, सूर्यप्रकाश, पाणी आणि पोषणतत्त्वांचा इतका अचूक समतोल साधला जातो की प्रत्येक आंब्याचे पीक हे एक उत्कृष्ट बनते. यामुळेच हा आंबा सामान्य बाजारात आढळत नाही तर केवळ खास लिलावांमध्ये आणि हाय-एंड ग्राहकांकडेच मिळतो.
मियाझाकी आंब्याचे वैशिष्ट्य काय आहे?
मिझायाकी आंबा अद्वितीय आहे. तो सर्वसाधारण आंब्यांपेक्षा खूपच वेगळा आहे. त्याची चव साखरेपेक्षाही गोड असते. तसेच या आंब्याचा रंग पिवळा किंवा हिरवा नसून गडद लाल असतो आणि तो खूप आकर्षक दिसतो. ज्यामुळे हा आंबा खाण्यासाठी मऊ आणि मुलायम लागतो. जपानमध्ये त्याच्या अंड्यासारख्या आकारामुळे आणि सूर्यासारख्या रंगामुळे त्याला ‘एग ऑफ द सन’ म्हणूनही ओळखले जाते. शिवाय त्याची लागवड अत्यंत नियंत्रित आणि वैज्ञानिक पद्धतीने केली जाते, ज्यात प्रत्येक फळाची विशेष काळजी घेतली जाते. यामुळेच हा आंबा केवळ चवीतच नव्हे, तर दिसण्यात आणि गुणवत्तेतही जगातील सर्वात उत्कृष्ट फळांपैकी एक मानला जातो.
मियाझाकी आंब्यांची किंमत किती आहे?
मियाझाकी आंब्याचा भाव प्रति किलो अडीच ते तीन लाख रुपयांपर्यंत असू शकतो. भारतात या किमतीत एक चांगली बाईक किंवा सेकंड-हँड कारसुद्धा विकत घेता येते. या उच्च किमतीचे कारण असे आहे की, हे आंबे सामान्य बाजारात विकले जात नाहीत. त्याऐवजी जपानमध्ये आंब्यांसाठी अनेक लिलाव कार्यक्रम आयोजित केले जातात. तथापि आता भारतात मध्य प्रदेशातील जबलपूर, बिहारमधील पूर्णिया आणि उत्तर प्रदेशातील वाराणसीसह अनेक ठिकाणी आंब्याची लागवड सुरू झाली आहे.
