NGX व्यवस्थापनामुळे निर्यातीला नवे बळ
धरणगाव : जळगाव जिल्ह्यातील केळी उत्पादक शेतकऱ्यांसाठी दिलासादायक आणि आशादायक घडामोड समोर आली आहे. धरणगाव तालुक्यातील पाळधी बु येथील प्रगतिशील शेतकरी तथा लोकनियुक्त सरपंच विजय रुपसिंग पाटील यांच्या शेतात उत्पादित करण्यात आलेली जी-९ वाणाची केळी आता गल्फ देशांसह आंतरराष्ट्रीय बाजारपेठेकडे रवाना होत आहे.\
२७ जून रोजी लागवड करण्यात आलेल्या या केळी पिकावर NGX व्यवस्थापन पद्धतीचा अवलंब करण्यात आला असून, त्यामुळे केळीला उच्च दर्जाची गुणवत्ता आणि अधिक टिकवण क्षमता प्राप्त झाली आहे. कटिंगनंतर दीर्घकाळ ताजेपणा टिकून राहतो, हे या केळीचे महत्त्वाचे वैशिष्ट्य ठरले आहे. सदर केळीची लागवड साडेपाच एकरमध्ये करण्यात आली आहे
या केळीचे सिलेंडर आकाराचे बंच, सुमारे एक फूट लांबी, आकर्षक चमक (शायनिंग) आणि सरासरी 29.5 रास ही वैशिष्ट्ये बाजारात विशेष ठरली असून, यामुळे शेतकऱ्यांना अधिक दर मिळत आहे. तसेच प्रति एकर सुमारे ४२ टन उत्पादन क्षमता असल्याने ही पद्धत आर्थिकदृष्ट्या फायदेशीर ठरत आहे. या प्रगत प्लॉटला जिल्हाभरातून हजारो शेतकरी भेट देत असून, त्यांनी प्रत्यक्ष पाहणी करून या पद्धतीचा अभ्यास सुरू केला आहे. तज्ज्ञांच्या मते, या गुणवत्तापूर्ण उत्पादनामुळे भविष्यात युरोप, रशिया तसेच गल्फ देशांमध्ये निर्यातीच्या मोठ्या संधी उपलब्ध होऊ शकतात.
दरम्यान, राज्याचे पाणीपुरवठा व स्वच्छता मंत्री तथा जळगाव जिल्ह्याचे पालकमंत्री गुलाबराव पाटील यांनी या केळी प्लॉटला भेट देऊन शेतकऱ्यांचे कौतुक केले. NGX व्यवस्थापनामुळे शेतकऱ्यांच्या उत्पन्नात वाढ होऊन आर्थिक प्रगतीला चालना मिळत असल्याचे त्यांनी नमूद केले. तसेच अशा उपक्रमांमुळे जळगाव जिल्ह्याचे “केळी हब” बनण्याचे स्वप्न साकार होईल, असा विश्वासही त्यांनी व्यक्त केला.
याच पार्श्वभूमीवर, पाळधी येथून केळीची निर्यात प्रक्रिया सुरू झाली असून,
आर.सी. राजमाता एक्स्पोर्ट (अंतुली) मार्फत माल सोलापूर येथील के.डी. एक्स्पोर्टकडे पाठविण्यात आला आहे. पुढे हा माल जवाहरलाल नेहरू बंदर, मुंबई येथून सौदी अरेबियातील जेद्दा बंदराकडे रवाना करण्यात येत आहे.
