जरांगेंच्या समर्थनार्थ धुळ्यात मराठा समाज आक्रमक; नकाणे तलावात जलसमाधी आंदोलन
पोलिसांनी आंदोलकांना वेळीच रोखले; मागण्या मान्य न झाल्यास मंत्री, आमदार-खासदारांना रस्त्यावर फिरू न देण्याचा इशारा
धुळे प्रतिनिधी : मराठा आरक्षणाच्या मागणीसाठी मनोज जरांगे पाटील यांच्या सुरू असलेल्या उपोषणाला पाठिंबा देण्यासाठी धुळ्यात सकल मराठा समाज आक्रमक झाला आहे. नकाणे तलाव परिसरात मराठा समाजाच्या वतीने जलसमाधी आंदोलनाचा प्रयत्न करण्यात आला. मात्र, खबरदारीचा उपाय म्हणून पोलिसांनी आंदोलकांना वेळीच रोखून ताब्यात घेतले.
यावेळी आंदोलकांनी शासनाच्या विरोधात जोरदार घोषणाबाजी करत आरक्षणाच्या मागणीसाठी आपला आक्रमक पवित्रा स्पष्ट केला. शासनाने मागण्या मान्य न केल्यास मंत्र्यांसह आमदार आणि खासदारांना रस्त्यावर फिरू देणार नाही, असा इशारा सकल मराठा समाजाच्या पदाधिकाऱ्यांनी दिला.
जरांगेंच्या उपोषणाला धुळ्यातून पाठिंबा
जालना जिल्ह्यातील अंतरवाली सराटी येथे मनोज जरांगे पाटील गेल्या सहा दिवसांपासून विविध मागण्यांसाठी उपोषण करत असल्याचे आंदोलकांनी सांगितले. कुणबी नोंदी असलेल्या व्यक्तींना जात प्रमाणपत्राचे वाटप तसेच हैदराबाद आणि सातारा गॅझेट तातडीने लागू करण्याच्या मागण्यांसाठी हे आंदोलन सुरू असल्याचे त्यांनी नमूद केले.
उपोषणामुळे जरांगे पाटील यांची प्रकृती खालावत असल्याच्या पार्श्वभूमीवर राज्यातील मराठा समाजात असंतोष वाढत असल्याचे चित्र आहे. त्याचाच भाग म्हणून धुळ्यातही सकल मराठा समाजाने आंदोलनाचे आयोजन केले.
नकाणे तलावात जलसमाधी आंदोलनाचा प्रयत्न
मनोज जरांगे पाटील यांच्या आंदोलनाला पाठिंबा देण्यासाठी सकल मराठा समाजाच्या वतीने नकाणे तलाव परिसरात जलसमाधी आंदोलन करण्यात आले. आंदोलक तलावात उतरण्याचा प्रयत्न करत असताना पोलिसांनी खबरदारी घेत त्यांना वेळीच रोखले.
परिस्थिती नियंत्रणात ठेवण्यासाठी पोलीस प्रशासनाकडून आवश्यक बंदोबस्त तैनात करण्यात आला होता. पोलिसांनी आंदोलकांना ताब्यात घेतल्यानंतर परिस्थिती नियंत्रणात आली.
शासनाला आंदोलन तीव्र करण्याचा इशारा
मराठा समाजाच्या मागण्यांवर शासनाने तातडीने निर्णय घ्यावा, अन्यथा आंदोलन अधिक तीव्र करण्यात येईल, असा इशारा यावेळी देण्यात आला. मागण्या मान्य न झाल्यास मंत्री, आमदार आणि खासदारांना रस्त्यावर फिरू न देण्याची भूमिका आंदोलकांनी मांडली.
मोठ्या संख्येने मराठा बांधव सहभागी
या आंदोलनात निंबा मराठे, दीपक रौंदळ, भैय्या शिंदे, संदीप पाटोळे, वीरेंद्र मोरे, राजेंद्र काळे, पप्पू माने, रवींद्र शिंदे, दिनेश चव्हाण, श्रीरंग जाधव, विकास बाबर, तुकाराम बागुल, सुरेश पवार, विक्रम काळे, राकेश भोसले, सुनील पाटील, संतोष लकडे, वैभव पाटील, भूषण बागुल यांच्यासह मराठा समाजाचे बांधव मोठ्या संख्येने उपस्थित होते.
