१३ वर्षांपासून बौद्ध विहारासाठी जागेची प्रतीक्षा; उपळखेडा ग्रामपंचायतीचा हलगर्जीपणा उघड
२०११च्या अर्जावर आजवर ठरावच नाही; बौद्ध समाजाची BDOंकडे धाव, जबाबदारांवर कारवाईची मागणी
सोयगाव | प्रतिनिधी – शिवराम जाधव : मौजे उपळखेडा (ता. सोयगाव) येथील बौद्ध समाज गेल्या १३ वर्षांपासून केवळ ३० बाय ३५ फूट जागेसाठी प्रशासनाच्या दारात हेलपाटे मारत असल्याचा आरोप समोर आला आहे. बौद्ध विहारासाठी जागा मिळावी, यासाठी सन २०११ मध्ये ग्रामपंचायतीकडे लेखी अर्ज देण्यात आला होता. मात्र, त्या अर्जावर आजपर्यंत ग्रामपंचायतीने कोणताही ठराव घेतला नसल्याचा दावा तक्रारीत करण्यात आला आहे.
उपळखेडा येथील बौद्ध बांधव प्रविण जिवराम सोनवणे यांच्यासह समस्त बौद्ध बांधवांनी ३० नोव्हेंबर २०११ रोजी ग्रामपंचायत उपळखेडा यांच्याकडे लेखी अर्ज सादर केला होता. गावातील गायरान अथवा सार्वजनिक जागेपैकी ३० बाय ३५ फूट जागा बौद्ध विहाराच्या बांधकामासाठी उपलब्ध करून द्यावी, अशी मागणी या अर्जाद्वारे करण्यात आली होती. संबंधित अर्जावर तत्कालीन सरपंच व ग्रामसेवक यांची पोहोच असल्याचेही सांगण्यात आले आहे.
२०११च्या अर्जावर अद्याप कारवाई नाही?
अर्ज सादर करून तब्बल १३ वर्षे उलटूनही ग्रामपंचायतीकडून या मागणीवर साधा ठरावदेखील करण्यात आला नसल्याचा आरोप बौद्ध समाजाने केला आहे. विहारासाठी जागा उपलब्ध नसल्याने समाजातील धार्मिक व सामाजिक कार्यक्रमांसाठी अडचणी निर्माण होत असून, काही कार्यक्रम उघड्यावर घ्यावे लागत असल्याचे नागरिकांचे म्हणणे आहे.
ग्रामपंचायतीच्या पातळीवर मागणीची दखल न घेतल्याने अखेर बौद्ध समाजाने ५ ऑक्टोबर २०२६ रोजी गटविकास अधिकारी, पंचायत समिती सोयगाव यांच्याकडे लेखी तक्रार दाखल केली. या तक्रारीवर पंचायत समितीचा आवक क्रमांक व दिनांकाचा शिक्का असल्याचे तक्रारदारांनी सांगितले आहे.
BDOंकडे तीन प्रमुख मागण्या
तक्रारीद्वारे बौद्ध समाजाने प्रशासनाकडे तीन प्रमुख मागण्या केल्या आहेत.
१) ग्रामपंचायत उपळखेडा यांना आदेश देऊन गायरान जागेतून ३० बाय ३५ फूट जागा बौद्ध विहारासाठी राखीव करण्यात यावी.
२) सन २०११ मध्ये सादर केलेल्या अर्जावर आजपर्यंत कोणती कार्यवाही करण्यात आली, याची फाईल नोटिंग व ग्रामपंचायत ठरावाची प्रत उपलब्ध करून द्यावी.
३) जागा उपलब्ध करून देण्यास टाळाटाळ करणाऱ्या संबंधित जबाबदार अधिकारी किंवा कर्मचाऱ्यांची चौकशी करून कारवाई करण्यात यावी.
BDOंच्या भूमिकेकडे गावाचे लक्ष
बौद्ध समाजाला एका छोट्याशा जागेसाठी तब्बल १३ वर्षे प्रतीक्षा करावी लागणे हा प्रशासनाच्या कार्यपद्धतीवर प्रश्नचिन्ह निर्माण करणारा प्रकार असल्याचे तक्रारदारांचे म्हणणे आहे. आता गटविकास अधिकारी या तक्रारीची कितपत गांभीर्याने दखल घेतात आणि ग्रामपंचायतीकडून २०११च्या अर्जावर झालेल्या कार्यवाहीचा अहवाल मागवून पुढील निर्णय घेतात का, याकडे उपळखेडा ग्रामस्थांचे लक्ष लागले आहे.
