युवा पत्रकार बापुसाहेब घोडेस्वार यांना राज्यस्तरीय ‘आदर्श पत्रकारिता पुरस्कार’

सहा महिन्यांत सहावा राज्यस्तरीय सन्मान; पुरस्कार आई-वडिलांसह स्वीकारत केला कृतज्ञतेचा भावनिक आविष्कार

अहिल्यानगर (जामखेड) | प्रतिनिधी : बापुसाहेब घोडेस्वार

स्वराज्य सरपंच सेवा संघ, महाराष्ट्र राज्य यांच्या वतीने आयोजित ‘राज्यस्तरीय सन्मान २०२६’ सोहळ्यात जामखेड येथील युवा पत्रकार बापुसाहेब रावसाहेब घोडेस्वार यांना ‘आदर्श पत्रकारिता पुरस्कार’ देऊन गौरविण्यात आले. पत्रकारितेच्या माध्यमातून सर्वसामान्यांचे प्रश्न मांडण्याच्या त्यांच्या कार्याची दखल घेत हा सन्मान प्रदान करण्यात आला. विशेष म्हणजे, गेल्या सहा महिन्यांत त्यांना मिळालेला हा सहावा राज्यस्तरीय पुरस्कार असल्याचे सांगण्यात आले. त्यांच्या या यशाबद्दल पत्रकारिता, सामाजिक आणि राजकीय क्षेत्रांतून अभिनंदन होत आहे.

मान्यवरांच्या हस्ते पुरस्कार प्रदान

अहिल्यानगर येथे आयोजित हा पुरस्कार सोहळा उत्साहात पार पडला. स्वराज्य सरपंच सेवा संघाचे सचिव तथा सरपंच संघटित चळवळीचे प्रणेते बाबासाहेब पावसे पाटील, संघटनेचे अध्यक्ष रोहित संजय पवार आणि प्रमुख अमोल शेवाळे यांच्या हस्ते बापुसाहेब घोडेस्वार यांना पुरस्कार प्रदान करण्यात आला.

शाही फेटा, सन्मानचिन्ह आणि आकर्षक ट्रॉफी असे या पुरस्काराचे स्वरूप होते. पत्रकारितेच्या क्षेत्रातील त्यांच्या कार्याची दखल घेत हा गौरव करण्यात आला.

आई-वडिलांचाही शाही सन्मान; सोहळ्यात भावनिक क्षण

या पुरस्कार सोहळ्यातील विशेष आकर्षण म्हणजे बापुसाहेब घोडेस्वार यांनी हा सन्मान आपल्या आई-वडिलांसोबत स्वीकारला. यावेळी त्यांच्या आई-वडिलांनाही व्यासपीठावर शाही फेटा बांधून सन्मानित करण्यात आले.

मुलाच्या यशात आई-वडिलांच्या योगदानाचा गौरव करणाऱ्या या प्रसंगाने उपस्थितांचे लक्ष वेधून घेतले. आपल्या यशाचा आनंद पालकांसोबत वाटून घेत त्यांनी कुटुंबाप्रती कृतज्ञता व्यक्त केली. हा भावनिक क्षण सोहळ्यातील लक्षवेधी ठरला.

डॉ. बाबासाहेब आंबेडकरांप्रती कृतज्ञता

पुरस्कार स्वीकारल्यानंतर बापुसाहेब घोडेस्वार यांनी आपल्या भावना व्यक्त करताना भारतीय संविधानाचे शिल्पकार भारतरत्न डॉ. बाबासाहेब आंबेडकर यांच्याप्रती प्रथम कृतज्ञता व्यक्त केली. पत्रकारितेच्या माध्यमातून सर्वसामान्य नागरिकांचे प्रश्न प्रशासनासमोर मांडण्याचे काम त्यांनी सातत्याने केले आहे.

या सोहळ्याला त्यांचे भाचे व मित्र दादा घोडेस्वार, सचिन घोडेस्वार यांच्यासह सामाजिक, राजकीय आणि पत्रकारिता क्षेत्रातील अनेक मान्यवर उपस्थित होते.

जामखेडच्या शिरपेचात मानाचा तुरा

बापुसाहेब घोडेस्वार यांना मिळालेल्या या सन्मानामुळे जामखेडच्या पत्रकारिता क्षेत्रात आनंदाचे वातावरण आहे. सहा महिन्यांत सहा राज्यस्तरीय पुरस्कार मिळाल्याच्या पार्श्वभूमीवर त्यांच्या कार्याचे विविध स्तरांतून कौतुक होत आहे. पुढील काळातही पत्रकारितेच्या माध्यमातून लोकांचे प्रश्न मांडण्याचे कार्य अधिक प्रभावीपणे सुरू राहावे, अशा शुभेच्छा त्यांना दिल्या जात आहेत.