पारोळ्यात ‘स्वर्गरथ’ समितीचा सामाजिक उपक्रम; शवपेटीचे लोकार्पण, ३०० पाणी जारचे वाटप!

लोकवर्गणीतून जमा झालेल्या निधीचा समाजोपयोगी विनियोग; अंगणवाड्या, शाळा, रुग्णालये, मंदिरे, मशिदी आणि शासकीय कार्यालयांना मिळणार पिण्याच्या पाण्याची सुविधा

पारोळा / सुरेश पाटोळे (प्रतिनिधी)

पारोळा : शहरातील ‘स्वर्गरथ’ समितीच्या वतीने शवपेटीचे लोकार्पण आणि ३०० पाणी जार वाटपाचा कार्यक्रम उत्साहात पार पडला. लोकवर्गणीतून उभारलेल्या निधीचा समाजहितासाठी उपयोग करण्याच्या उद्देशाने समितीने हा उपक्रम हाती घेतला आहे. या उपक्रमामुळे गरजू नागरिकांना अंत्यविधीच्या वेळी मदत मिळण्याबरोबरच विविध सार्वजनिक ठिकाणी पिण्याच्या पाण्याची सुविधाही उपलब्ध होणार आहे.

पारोळा शहरासाठी स्वर्गरथ उपलब्ध करून देण्याच्या उद्देशाने सुमारे दोन वर्षांपूर्वी समितीची स्थापना करण्यात आली होती. त्यावेळी सोशल मीडियाच्या माध्यमातून नागरिकांना लोकवर्गणी देण्याचे आवाहन करण्यात आले होते. या आवाहनाला शहरातील अनेक दानशूर व्यक्तींनी उत्स्फूर्त प्रतिसाद देत आर्थिक सहकार्य केले. त्यातून स्वर्गरथ सेवा सुरू करण्यात आली. मागील दोन वर्षांपासून ही सेवा अत्यल्प दरात अविरतपणे सुरू आहे.

शिल्लक निधीतून समाजोपयोगी उपक्रम

स्वर्गरथ सेवेसाठी जमा झालेल्या लोकवर्गणीतील काही निधी शिल्लक असल्याने त्याचा समाजोपयोगी विनियोग कसा करता येईल, याबाबत समितीने विचारविनिमय केला. त्यातून शहरासाठी शवपेटी घेण्याचा निर्णय सर्वानुमते घेण्यात आला. तसेच उर्वरित निधीतून तालुक्यातील अंगणवाड्या, जिल्हा परिषद शाळा, महाविद्यालये, शासकीय आरोग्य केंद्रे, कुटीर रुग्णालय, शहरातील प्रमुख मंदिरे व मशिदी तसेच शासकीय कार्यालयांना मिळून ३०० पाणी जार वितरित करण्याचे नियोजन करण्यात आले.

विजयानंद हॉलमध्ये लोकार्पण सोहळा

या उपक्रमाचा लोकार्पण सोहळा पारोळा येथील विजयानंद हॉलमध्ये पार पडला. कार्यक्रमाच्या अध्यक्षस्थानी स्वर्गरथ समितीचे अध्यक्ष डॉ. योगेंद्र पवार होते. वकील संघाचे माजी अध्यक्ष ॲड. आनंदराव पवार यांनीही कार्यक्रमात अध्यक्षस्थान भूषविले.

यावेळी माजी पालकमंत्री डॉ. सतीशराव पाटील, लोकनियुक्त नगराध्यक्ष चंद्रकांत पाटील, पंचायत समितीचे गटविकास अधिकारी (बीडीओ) भूषण कदम, माजी जिल्हा परिषद सदस्य रोहन पाटील, कृषी उत्पन्न बाजार समितीचे उपसभापती मनोराज पाटील, प्रसिद्ध सनदी लेखापाल (सीए) मुकेश चोरडिया, आरोग्य अधिकारी डॉ. चंद्रकांत सूर्यवंशी, ज्वेलर्स असोसिएशनचे सुनील भालेराव, प्रा. जे. बी. पाटील आदी उपस्थित होते.

याशिवाय पत्रकार महासंघाचे अध्यक्ष व सदस्य, मराठा सेवा संघटनेचे पदाधिकारी, विविध राजकीय पक्षांचे प्रतिनिधी, अंगणवाडी सेविका, शिक्षक, आरोग्य कर्मचारी, सामाजिक कार्यकर्ते आणि विविध सामाजिक संघटनांचे अध्यक्ष व सदस्यांसह नागरिक मोठ्या संख्येने उपस्थित होते.

समितीच्या कार्याचे कौतुक

स्वर्गरथ सेवा सुरू केल्यानंतर शिल्लक राहिलेल्या निधीतून शवपेटी आणि पाणी जार वाटपाचा उपक्रम राबविण्यात आल्याने समितीच्या कार्याचे विविध स्तरांतून कौतुक होत आहे. लोकसहभागातून उभारलेल्या निधीचा सार्वजनिक हितासाठी उपयोग करण्याचा समितीचा प्रयत्न या उपक्रमातून अधोरेखित झाला.

कार्यक्रमाचे आयोजन व आभारप्रदर्शन समितीचे अध्यक्ष डॉ. योगेंद्र पवार यांनी केले, तर सूत्रसंचालन सुनील भालेराव यांनी केले.