युवारंग २०२६-२७ मध्ये नाहाटा महाविद्यालयाची दैदीप्यमान कामगिरी; ११ पारितोषिकांची कमाई!

संगीत आणि नाट्य स्पर्धांमध्ये विद्यार्थ्यांची चमक; स्व. वसुंधरा चौधरी स्मृती प्रोत्साहनपर फिरता चषकही महाविद्यालयाला प्राप्त

भुसावळ | प्रतिनिधी

आंतरमहाविद्यालयीन युवा महोत्सव ‘युवारंग २०२६-२७’ मध्ये भुसावळ कला, विज्ञान व पू. ओ. नाहाटा वाणिज्य महाविद्यालयाने उल्लेखनीय कामगिरी करत एकूण ११ पारितोषिके पटकावली. संगीत आणि नाट्य विभागातील विविध स्पर्धांमध्ये विद्यार्थ्यांनी आपल्या कला, कौशल्य आणि प्रतिभेचे प्रभावी प्रदर्शन केले. यासोबतच महाविद्यालयाला स्व. वसुंधरा चौधरी स्मृती प्रोत्साहनपर युवारंग फिरता चषकही प्राप्त झाला. या यशामुळे महाविद्यालयाच्या सांस्कृतिक वैभवात भर पडली आहे.

संगीत स्पर्धांमध्ये विद्यार्थ्यांची उल्लेखनीय कामगिरी

संगीत विभागात ऋषिकेश उमेश ढोमणे याने अभ्यंकर सुगमगीत गायन स्पर्धेत तृतीय पारितोषिक मिळविले. तसेच अभ्यंकर नाट्यगीत गायन, शास्त्रीय गायन, भारतीय सुगम गायन आणि नाट्यगीत गायन एकल या चार स्पर्धांमध्ये द्वितीय पारितोषिके प्राप्त केली.

अर्जुन विठ्ठलराव नागवे याने भारतीय शास्त्रीय तालवाद्य स्पर्धेत द्वितीय पारितोषिक मिळविले. प्रगती किशोर तांबट हिने पाश्चात्य गायन एकल स्पर्धेत प्रथम पारितोषिक पटकावले. पाश्चात्य समूहगीत स्पर्धेत द्वितीय, तर भारतीय समूहगीत स्पर्धेत प्रथम पारितोषिक मिळविणाऱ्या संघात प्रगती किशोर तांबट, अनुष्का विजय आंबेकर, करुणा आत्माराम बाऱ्हे, युक्ती नवीन चौरडिया आणि स्वरा बेलोकर यांचा सहभाग होता.

नाट्य विभागातही यशाची मोहोर

नाट्य विभागात स्वरा संदीप बेलोकर हिने मिमिक्री स्पर्धेत तृतीय पारितोषिक मिळविले. प्रहसन स्पर्धेत चेतन दिलीप चौधरी, रिया मिस्तरी, निशिता ठाकूर, अक्षय चत्रत, कांचन खुपसे आणि रोहित लोलके यांच्या संघाने तृतीय पारितोषिक प्राप्त केले.

संगीत आणि नाट्य विभागातील या यशामुळे महाविद्यालयाच्या सांस्कृतिक उपक्रमांना नवी ओळख मिळाली आहे.

मान्यवरांकडून यशस्वी विद्यार्थ्यांचे अभिनंदन

विद्यार्थ्यांच्या या यशाबद्दल ताप्ती एज्युकेशन सोसायटीचे अध्यक्ष डॉ. मोहन भाऊ फालक, चेअरमन महेश भाऊ फालक, सचिव विष्णू भाऊ चौधरी आणि कोषाध्यक्ष संजयकुमार नाहाटा यांनी सर्व यशस्वी विद्यार्थी व मार्गदर्शकांचे अभिनंदन करून पुढील वाटचालीसाठी शुभेच्छा दिल्या.

महाविद्यालयाचे प्राचार्य डॉ. बी. एच. बऱ्हाटे, उपप्राचार्य दीपक पाटील, डॉ. जी. आर. वाणी आणि कला मंडळ प्रमुख प्रा. डॉ. प्रफुल्ल इंगोले यांनी विद्यार्थ्यांना वेळोवेळी मार्गदर्शन व प्रोत्साहन दिले. कार्यालयीन अधीक्षक भगवान तायडे, सचिन पाटील, मुकेश फिरके आणि विनीत पाटील यांनीही या यशासाठी सहकार्य केले.

मार्गदर्शकांचे मोलाचे योगदान

युवारंग २०२६-२७ साठी महाविद्यालयाचे संघप्रमुख म्हणून प्रा. विलास सोळुंके आणि प्रा. डॉ. वंदना नेमाडे यांनी, तर सहसमन्वयक म्हणून प्रा. डॉ. शलाका निकम यांनी जबाबदारी पार पाडली.

विद्यार्थ्यांच्या कलागुणांना वाव देणारे महाविद्यालयातील वातावरण, प्राध्यापकांचे मार्गदर्शन, संस्थेचे पाठबळ आणि सहकाऱ्यांचे योगदान यामुळे हे यश साध्य झाल्याची भावना व्यक्त करण्यात आली. महाविद्यालयाच्या या कामगिरीबद्दल सर्व स्तरांतून अभिनंदन होत आहे.