संविधानिक मूल्यांची जपणूक व विद्यार्थ्यांमध्ये जागृती घडविल्याबद्दल गौरव
पुणे : महाराष्ट्रात राबविण्यात येत असलेल्या संविधान जागर अभियानांतर्गत संविधान अभ्यासक व मार्गदर्शक शिक्षक म्हणून संघशिल भद्रे उर्फ एस. एन. नांदेडकर सर यांचा सन्मानपत्र देऊन गौरव करण्यात आला. विद्यार्थ्यांमध्ये संविधानिक मूल्यांची जाणीव निर्माण करण्यासाठी त्यांनी केलेल्या उल्लेखनीय कार्याची दखल घेत हा सन्मान प्रदान करण्यात आला. स्पर्धा परीक्षा देणाऱ्या विद्यार्थ्यांना केवळ अभ्यासापुरते मर्यादित न ठेवता त्यांच्यामध्ये संविधानाबद्दल आदर, समता, बंधुता आणि न्याय या मूल्यांची रुजवण करण्यासाठी नांदेडकर सरांनी सातत्याने प्रयत्न केले आहेत. त्यांच्या या कार्यामुळे अनेक विद्यार्थ्यांमध्ये सामाजिक जाणीव वाढली असून ते जबाबदार नागरिक म्हणून घडत असल्याचे मान्यवरांनी नमूद केले.
या सन्मान सोहळ्याला विविध क्षेत्रातील मान्यवरांची उपस्थिती लाभली. ‘आज का आनंद’ व ‘संध्यानंद’चे संपादक श्याम अग्रवाल, ‘भारतीय संविधान आणि लोकशाही’ या पुस्तकाचे लेखक प्रा. डॉ. जयसिंह ओहोळ, सुनिता सुभाष ओहोळ, सुरेश राजपुरे सर, समीर थोरात सर, प्रा. काकासाहेब लकारे आदी उपस्थित होते. कार्यक्रमात उपस्थितांनी नांदेडकर सरांच्या कार्याचे कौतुक करत त्यांना पुढील वाटचालीस शुभेच्छा दिल्या. सन्मानपत्रात महात्मा ज्योतिराव फुले यांनी स्त्रिया व बहुजनांना शिक्षणाच्या मुख्य प्रवाहात आणण्यासाठी केलेल्या कार्याचा उल्लेख करण्यात आला, तसेच डॉ. बाबासाहेब आंबेडकर यांनी संविधानाच्या माध्यमातून सर्वांना समान शिक्षणाचा हक्क दिला, याचीही गौरवपूर्ण नोंद घेण्यात आली. या महान व्यक्तींच्या आदर्शांवर आधारित शिक्षण देत विद्यार्थ्यांना घडविण्याचे कार्य नांदेडकर सर करत असल्याबद्दल त्यांचा विशेष सन्मान करण्यात आला.
संविधान जागर अभियानाच्या माध्यमातून राज्यभरात संविधानाबद्दल जागरूकता निर्माण करण्याचे काम सुरू असून, या अभियानात विविध क्षेत्रातील तज्ज्ञ, अभ्यासक आणि सामाजिक कार्यकर्ते सहभागी झाले आहेत. या उपक्रमाला डॉ. नितीन राऊत आणि तुषार गांधी यांचे मार्गदर्शन लाभत आहे. तसेच निमंत्रक समितीत न्यायमूर्ती बी. जी. कोळसे पाटील, डॉ. राम पुनियानी, न्या. ए. एम. ठिपसे, न्या. टी. व्ही. नलावडे, धनाजी गुरव, नीरज जैन आदी मान्यवरांचा सहभाग आहे.
या कार्यक्रमासाठी सुरेश तान्हुबाई बाबुराव राजपुरे यांचे विशेष सहकार्य लाभले.
दरम्यान, या सन्मानामुळे एस. एन. नांदेडकर सरांच्या कार्याला नवे बळ मिळणार असून, संविधान जागरूकतेच्या क्षेत्रात त्यांनी केलेल्या योगदानाची समाजात व्यापक दखल घेतली जात आहे. भविष्यातही विद्यार्थ्यांमध्ये संविधानिक मूल्यांची जपणूक करण्यासाठी ते अधिक जोमाने कार्य करतील, असा विश्वास यावेळी व्यक्त करण्यात आला.
