> आयपीएस अजय पाल शर्मा आणि टीएमसी उमेदवारातील वाद विकोपाला
कोलकाता/फालता : पश्चिम बंगाल विधानसभा निवडणुकीच्या पार्श्वभूमीवर राजकीय वातावरण कमालीचे तापले असून, आता पोलीस अधिकारी आणि लोकप्रतिनिधी यांच्यातील संघर्ष थेट रस्त्यावर आला आहे. उत्तर प्रदेश केडरचे ‘एन्काउंटर स्पेशालिस्ट’ म्हणून ओळखले जाणारे आयपीएस अधिकारी अजय पाल शर्मा आणि तृणमूल काँग्रेसचे उमेदवार जहांगीर खान यांच्यातील वाकयुद्ध आता ‘फिल्मी’ संवादांपर्यंत पोहोचले आहे.
दक्षिण २४ परगणा जिल्ह्यातील फालता परिसरात मतदारांना धमकावले जात असल्याच्या तक्रारी निवडणूक आयोगाकडे प्राप्त झाल्या होत्या. या तक्रारींची शहानिशा करण्यासाठी निवडणूक ड्युटीवर असलेले आयपीएस अजय पाल शर्मा आपल्या पथकासह जहांगीर खान यांच्या निवासस्थानी पोहोचले.
यावेळी धक्कादायक बाब समोर आली की, स्थानिक नागरिक आणि खुद्द स्थानिक पोलिसांनीही जहांगीर खान यांच्या घराचा पत्ता सांगण्यास टाळाटाळ केली. मात्र, शोध घेतला असता जहांगीर खान यांच्या घराबाहेर पश्चिम बंगाल पोलिसांचे तब्बल १४ कर्मचारी तैनात असल्याचे आढळून आले. निवडणूक काळात एका उमेदवाराला विनापरवाना इतकी मोठी सुरक्षा कशी मिळाली, यावरून शर्मा यांनी स्थानिक प्रशासनाला धारेवर धरले.
“वो सिंघम है, तो मैं पुष्पा हूँ”
या कारवाईमुळे संतापलेल्या जहांगीर खान यांनी अजय पाल शर्मा यांना थेट आव्हान दिले. खान म्हणाले, “जर अजय पाल शर्मा स्वतःला ‘सिंघम’ समजत असतील, तर मी सुद्धा ‘पुष्पा’ आहे… मी झुकणार नाही!” इतकेच नव्हे तर, “आम्ही केंद्रीय दलांना (सीआरपीएफ) हवेत उडवून देऊ,” अशी प्रक्षोभक धमकीही त्यांनी दिल्याने खळबळ उडाली आहे.
आयपीएस शर्मांचा इशारा: “नंतर रडू नका…”
जहांगीर खान यांच्या धमकीला उत्तर देताना अजय पाल शर्मा यांनीही कडक शब्दांत सुनावले. “आम्ही तुमची नीट खबर घेऊ, तेव्हा मात्र रडत बसू नका,” असा इशारा शर्मा यांनी दिला आहे. शर्मा यांच्या आक्रमक भूमिकेमुळे तृणमूल काँग्रेसमध्ये अस्वस्थता पसरली आहे.
राजकीय रंग: अखिलेश यादव यांचा हस्तक्षेप
या वादाचे पडसाद उत्तर प्रदेशच्या राजकारणातही उमटले आहेत. समाजवादी पक्षाचे अध्यक्ष अखिलेश यादव यांनी अजय पाल शर्मा यांच्यावर टीका करताना त्यांना ‘भाजपचा एजंट’ असे संबोधले आहे. “भाजप आपल्या मर्जीतील अधिकाऱ्यांना बंगालमध्ये पाठवून लोकशाहीची गळचेपी करत आहे,” असा आरोप अखिलेश यादव यांनी केला आहे.
निवडणूक आयोगाची भूमिका
उमेदवाराने केंद्रीय दलांना उडवून देण्याची भाषा केल्याने निवडणूक आयोगाने या प्रकरणाची गंभीर दखल घेतली आहे. जहांगीर खान यांच्यावर प्रक्षोभक भाषण आणि निवडणूक प्रक्रियेत अडथळा आणल्याप्रकरणी गुन्हा दाखल करण्याचे आदेश देण्यात आले असून, फालता परिसरातील सुरक्षा वाढवण्यात आली आहे.
