ऐन उन्हाळ्यातील पाणीटंचाईवर तत्काळ उपाय

सभापती कीर्तीकांत चौबे यांच्या हस्तक्षेपामुळे धोबीवाडा परिसराचा पाणीपुरवठा सुरळीत

नशिराबाद | धीरज सत्यवाल |

नशिराबाद येथील धोबीवाडा आणि सुरभी चौक परिसरात गेल्या काही दिवसांपासून निर्माण झालेला पाणीपुरवठ्याचा गंभीर प्रश्न अखेर मार्गी लागला आहे. मुख्य घरगुती पाणीपुरवठा करणारी पाइपलाइन फुटल्याने सुमारे १० ते १२ कुटुंबांचा पाणीपुरवठा विस्कळीत झाला होता. मात्र, पाणीपुरवठा सभापती कीर्तीकांत चौबे यांच्या तत्परतेमुळे हा प्रश्न तातडीने सोडविण्यात आला.

फुटलेल्या पाइपलाइनमुळे नागरिक त्रस्त
सुरभी चौक परिसरातून जाणारी जमिनीखालची पाइपलाइन अचानक फुटल्याने मोठ्या प्रमाणात पाण्याचा अपव्यय होत होता. त्याचवेळी अनेक घरांमध्ये पाणी पोहोचत नसल्याने नागरिकांना मोठ्या गैरसोयीचा सामना करावा लागत होता. वाढत्या उन्हाच्या तीव्रतेमुळे परिस्थिती अधिक गंभीर बनली होती.

सामाजिक कार्यकर्ते महेश सपकाळे यांचा पुढाकार
या समस्येची दखल घेत सामाजिक कार्यकर्ते महेश सपकाळे यांनी तातडीने प्रशासनाशी संपर्क साधला. त्यांनी पाणीपुरवठा सभापती कीर्तीकांत चौबे यांना परिस्थितीची माहिती देत त्वरित उपाययोजना करण्याची मागणी केली.

प्रशासनाची युद्धपातळीवर कारवाई
तक्रार मिळताच सभापती कीर्तीकांत चौबे यांनी नगर परिषदेच्या संबंधित विभागाला तत्काळ सूचना दिल्या. त्यानंतर कर्मचारी घटनास्थळी दाखल होत युद्धपातळीवर दुरुस्तीचे काम हाती घेण्यात आले. अल्पावधीतच फुटलेली पाइपलाइन दुरुस्त करण्यात आली आणि परिसराचा पाणीपुरवठा पूर्ववत करण्यात आला. या तातडीच्या कार्यवाहीबद्दल परिसरातील नागरिकांनी सभापती कीर्तीकांत चौबे तसेच नगर परिषद प्रशासनाचे आभार मानले आहेत.

“नागरिकांची गैरसोय होऊ नये ही आमची प्राथमिकता आहे. तक्रार प्राप्त होताच आम्ही त्वरित दुरुस्तीचे आदेश दिले. शहरातील पाणीपुरवठ्याबाबत कोणतीही समस्या निर्माण झाल्यास तिचे तात्काळ निराकरण करण्यात येईल.”
— कीर्तीकांत चौबे, सभापती, पाणीपुरवठा विभाग