‘संत मुक्ताई सेवेच्या ठायी आदर्श पत्रकार’ पुरस्काराने निलेश मेढे यांचा गौरव

‘संत मुक्ताई सेवेच्या ठायी आदर्श पत्रकार’ पुरस्काराने निलेश मेढे यांचा गौरव

संत मुक्ताईच्या आध्यात्मिक व वारकरी परंपरेचे सातत्यपूर्ण वृत्तांकन; मूर्ती, सन्मानपत्र, रुमाल व टोपी देऊन सन्मान

मुक्ताईनगर | प्रतिनिधी : संत मुक्ताई संस्थान, श्रीक्षेत्र कोथळी व मुक्ताईनगर तसेच संत मुक्ताई पालखी आगमन सोहळा उत्सव समिती यांच्या वतीने देण्यात येणारा ‘संत मुक्ताई सेवेच्या ठायी आदर्श पत्रकार पुरस्कार २०२६’ मुक्ताईनगर येथील पत्रकार निलेश मोहन मेढे यांना प्रदान करण्यात आला. श्रीक्षेत्र कोथळी येथील संत मुक्ताईच्या मूळ मंदिरात १८ ऑगस्ट रोजी भक्तिमय वातावरणात पुरस्कार वितरण सोहळा पार पडला.

यावेळी संत मुक्ताईची मूर्ती, सन्मानपत्र, रुमाल व टोपी देऊन पत्रकार निलेश मेढे यांचा गौरव करण्यात आला. संत मुक्ताबाई यांच्या पावन तीर्थक्षेत्राची आध्यात्मिक, सांस्कृतिक आणि वारकरी परंपरा जनमानसापर्यंत पोहोचविण्यासाठी केलेल्या सातत्यपूर्ण पत्रकारितेची दखल घेत हा पुरस्कार प्रदान करण्यात आला.

पालखी सोहळ्याचे सातत्यपूर्ण वृत्तांकन

संत मुक्ताबाई तीर्थक्षेत्रातील पंधरवडी एकादशी, मासिक एकादशी वारी, विविध धार्मिक व सामाजिक कार्यक्रम तसेच संत मुक्ताई पालखी सोहळ्याच्या प्रस्थानापासून आगमनापर्यंतच्या विविध घडामोडींचे मेढे यांनी सातत्याने वृत्तांकन केले आहे. त्यांच्या माध्यमातून ही पवित्र परंपरा भाविक, वारकरी आणि वाचकांपर्यंत पोहोचली.

पत्रकारितेच्या माध्यमातून संत विचार, वारकरी संस्कृती, भक्ती, सेवा आणि तीर्थक्षेत्राची महती जनमानसात पोहोचविणाऱ्या त्यांच्या निःस्वार्थ, संवेदनशील आणि सातत्यपूर्ण कार्याची दखल संस्थान व उत्सव समितीने घेतली.

मान्यवरांची उपस्थिती

पुरस्कार वितरण सोहळ्यास संत मुक्ताई संस्थानचे अध्यक्ष अ‍ॅड. रवींद्र पाटील, पालखी सोहळा प्रमुख रविंद्र महाराज हरणे, महामंडलेश्वर जनार्दन हरी महाराज, ह.भ.प. उद्धव महाराज जुनारे, ह.भ.प. विशाल महाराज खोले, विश्वस्त पंजाबराव पाटील, सदाशिव पाटील, पुरुषोत्तम वंजारी, श्रीकांत पाटील तसेच पत्रकार मोतीलाल जोगी, संतोष मराठे, राजेश चौधरी, संदीप जोगी, छबिलदास पाटील, अमोल वैद्य आदी उपस्थित होते.

यावेळी संत मुक्ताई पालखी आगमन सोहळा उत्सव समितीचे पदाधिकारी, मुक्ताईनगर येथील पत्रकार बांधव, संत मुक्ताई संस्थानचे विश्वस्त, वारकरी आणि भाविक मोठ्या संख्येने उपस्थित होते.

संत मुक्ताईच्या कार्याचा आणि वारकरी परंपरेचा प्रसार करणाऱ्या पत्रकारितेचा झालेला हा सन्मान उपस्थितांसाठी विशेष कौतुकाचा आणि अभिमानाचा ठरला.