एक्झर्बिया अबोड संकुलात दहीहंडीचा जल्लोष

एक्झर्बिया अबोड संकुलात दहीहंडीचा जल्लोष

मुलींच्या ग्रुपने फोडली दहीहंडी; अन्वी शिर्सुलवारच्या नेतृत्वाला दाद, चिमुकल्यांपासून ज्येष्ठांपर्यंत उत्स्फूर्त सहभाग

वडगाव मावळ (जांभुळगाव) | विशेष प्रतिनिधी :

गोपाळकाल्याच्या निमित्ताने वडगाव मावळ (जांभुळगाव) येथील एक्झर्बिया अबोड संकुलात दहीहंडी उत्सव मोठ्या उत्साहात आणि आनंदी वातावरणात साजरा करण्यात आला. एक्झर्बिया अबोड सार्वजनिक उत्सव मंडळाच्या वतीने आयोजित या उत्सवाला संकुलातील रहिवाशांचा उत्स्फूर्त प्रतिसाद मिळाला. चिमुकल्यांपासून लहान-थोरांपर्यंत तसेच महिला-पुरुषांनी मोठ्या संख्येने उपस्थित राहत दहीहंडी सोहळ्याचा मनमुराद आनंद लुटला.

यंदाच्या दहीहंडी उत्सवाचे खास आकर्षण ठरले ते संकुलातील मुलींच्या ग्रुपने फोडलेली दहीहंडी. मुलींनी एकत्रितपणे उत्साह आणि आत्मविश्वासाने दहीहंडी फोडत उपस्थितांची वाहवा मिळवली. या मुलींच्या ग्रुपचे प्रतिनिधित्व अन्वी शिर्सुलवार हिने केले. मुलींच्या या विशेष सहभागाचे कौतुक करत आयोजकांकडून त्यांना खास बक्षीस देऊन गौरविण्यात आले.

मुलींच्या ग्रुपने दहीहंडी फोडताच उपस्थितांनी टाळ्यांचा कडकडाट आणि जल्लोष करत त्यांचा उत्साह वाढवला. पारंपरिक दहीहंडी उत्सवाला मुलींच्या सहभागाची जोड मिळाल्याने यंदाचा सोहळा अधिकच संस्मरणीय ठरला. उत्साह, एकजूट आणि आत्मविश्वासाचा संदेश देणारा हा क्षण संकुलातील नागरिकांच्या विशेष स्मरणात राहिला.

यंदाच्या उत्सवात महिलांची उपस्थिती विशेष लक्षणीय होती. महिला वर्गाने मोठ्या संख्येने सहभागी होत कार्यक्रमाचा आनंद घेतला. त्यामुळे संपूर्ण परिसरात उत्साहाचे आणि आपुलकीचे वातावरण निर्माण झाले होते. लहान मुलांच्या उत्साहापासून ज्येष्ठांच्या आनंदापर्यंत सर्वच वयोगटातील नागरिकांनी उत्सवात सहभाग घेतला.

कार्यक्रमातील माऊली भजन मंडळाचा ‘राधा डान्स’ हा उपस्थितांसाठी आकर्षणाचा केंद्रबिंदू ठरला. भक्तिमय वातावरणाला नृत्याची सुंदर जोड मिळाल्याने कार्यक्रमाची रंगत वाढली. याशिवाय चिमुकल्या अनन्या शहारे आणि शिवज्ञा क्षीरसागर यांच्या उत्कृष्ट नृत्याने उपस्थितांची मने जिंकली. त्यांच्या निरागस आणि उत्स्फूर्त सादरीकरणाला उपस्थितांनी टाळ्यांच्या कडकडाटात दाद दिली.

दहीहंडीच्या निमित्ताने संकुलातील वातावरण कमालीचे भक्तिमय, उत्साही आणि आनंदमय झाले होते. एकमेकांना शुभेच्छा देत नागरिकांनी उत्सवाचा आनंद साजरा केला. पारंपरिक सणाच्या माध्यमातून संकुलातील नागरिकांना एकत्र आणण्याबरोबरच सामाजिक सलोखा आणि आपुलकीची भावना वृद्धिंगत करण्याचा प्रयत्न या आयोजनातून दिसून आला.

एक्झर्बिया अबोड सार्वजनिक उत्सव मंडळाच्या वतीने करण्यात आलेल्या नियोजनामुळे कार्यक्रम उत्साहात पार पडला. दहीहंडी उत्सव यशस्वी करण्यासाठी पंढरीनाथ हिंगे, अनंत गुळवे, पक्क्या काळतोंडे आणि धनंजय वाणी यांचे मोलाचे सहकार्य लाभले.

चौकट : मुलींच्या दहीहंडीने वेधले लक्ष
यंदाच्या उत्सवाचे वैशिष्ट्य म्हणजे संकुलातील मुलींच्या ग्रुपने दहीहंडी फोडली. अन्वी शिर्सुलवार हिने मुलींच्या ग्रुपचे प्रतिनिधित्व केले. आयोजकांकडून या ग्रुपला खास बक्षीस देऊन त्यांच्या उत्साहाचे कौतुक करण्यात आले.