दापोरे जि.प. शाळेत शिक्षक दिन उत्साहात साजरा

विद्यार्थ्यांनी साकारल्या मुख्याध्यापक व शिक्षकांच्या भूमिका; प्रत्यक्ष अध्यापनातून अनुभवले ‘शिक्षक होण्याचे’ कौशल्य

शैलेश गुरव, जळगाव ग्रामीण (प्रतिनिधी)

दापोरे : जिल्हा परिषद उच्च प्राथमिक शाळा, दापोरे येथे ५ सप्टेंबर २०२६ रोजी शिक्षक दिन उत्साहपूर्ण व आनंदी वातावरणात साजरा करण्यात आला. शिक्षक दिनाचे औचित्य साधून इयत्ता सातवीतील विद्यार्थ्यांनी चक्क मुख्याध्यापक व शिक्षकांची भूमिका साकारत इयत्ता पहिली ते सहावीच्या विद्यार्थ्यांना प्रत्यक्ष अध्यापनाचा अनुभव दिला.

विद्यार्थ्यांनी शिक्षकाची भूमिका अत्यंत जबाबदारीने पार पाडत वर्गात अध्यापन केले. यावेळी त्यांनी विद्यार्थ्यांशी संवाद साधला तसेच विविध शैक्षणिक उपक्रम राबविले. शिक्षकाच्या भूमिकेचा प्रत्यक्ष अनुभव घेतल्याने विद्यार्थ्यांमध्ये नेतृत्वगुण, आत्मविश्वास, संवादकौशल्य आणि अध्यापनाची आवड विकसित होण्यास मदत झाली.

निपुण भारत अभियानातून नाविन्यपूर्ण उपक्रम

निपुण भारत अभियानांतर्गत दापोरे जिल्हा परिषद शाळेत सातत्याने विविध नाविन्यपूर्ण व विद्यार्थी-केंद्रित शैक्षणिक उपक्रम राबविले जातात. त्याचाच एक भाग म्हणून शिक्षक दिनानिमित्त विद्यार्थ्यांना शिक्षकाची भूमिका अनुभवण्याची संधी देण्यात आली. या उपक्रमातून विद्यार्थ्यांनी केवळ शिक्षकाची भूमिका साकारली नाही, तर अध्यापनामागील जबाबदारी आणि कौशल्याचीही जाणीव करून घेतली.

या उपक्रमासाठी मुख्याध्यापक गोपीचंद भालेराव तसेच शिक्षक राहुल मोरे, समाधान पाटील, शैला महाजन, कविता सोनवणे, सुवर्णा साळुंखे, कांचन राणे आणि उज्वला बेलदार यांचे मार्गदर्शन लाभले.

शाळा व्यवस्थापन समितीचे अध्यक्ष प्रवीण काळे व उपाध्यक्ष समाधान तांदळे यांचेही उपक्रमाला बहुमोल मार्गदर्शन मिळाले.

विद्यार्थ्यांनी शिक्षकांच्या भूमिका साकारत केलेल्या या अभिनव उपक्रमामुळे शाळेत दिवसभर उत्साहाचे वातावरण होते. विद्यार्थ्यांच्या सर्वांगीण विकासाला चालना देणाऱ्या या उपक्रमाचे पालक व ग्रामस्थांनी कौतुक केले.