भडगाव तालुक्याची पैसेवारी ५० पैशांच्या आत करा

भडगाव तालुक्याची पैसेवारी ५० पैशांच्या आत करा

शेतकरी संघटनेचे तहसीलदारांना निवेदन; वस्तुनिष्ठ पीक पाहणी व शेतकऱ्यांच्या उपस्थितीत पीक कापणी प्रयोगाची मागणी

भडगाव प्रतिनिधी : गणेश रावळ

भडगाव : यंदाच्या खरीप हंगामात पावसाचे असमान वितरण, पावसातील दीर्घ खंड तसेच काही भागांत झालेल्या अत्यल्प पावसामुळे पिकांवर मोठा परिणाम झाला आहे. अनेक ठिकाणी अपेक्षित उत्पादन मिळाले नसल्याने भडगाव तालुक्यातील खरीप पिकांची अंतिम पैसेवारी ५० पैशांच्या आत निश्चित करावी, अशी मागणी शेतकरी संघटनेचे तालुकाध्यक्ष अखिलेश रविंद्र पाटील यांनी तहसीलदारांकडे निवेदनाद्वारे केली आहे.

तालुक्यातील अनेक गावांमध्ये कापूस, मका, सोयाबीन, बाजरी, ज्वारी, भाजीपाला तसेच अन्य खरीप पिकांच्या उत्पादनावर प्रतिकूल परिणाम झाल्याचे शेतकरी संघटनेने निवेदनात नमूद केले आहे. पावसातील खंड आणि प्रतिकूल हवामानामुळे पिकांची वाढ खुंटली असून, उत्पादनात घट होण्याची शक्यता असल्याचे संघटनेचे म्हणणे आहे.

प्रत्यक्ष शेतात जाऊन पीक पाहणीची मागणी

पिकांच्या नुकसानीचे वस्तुनिष्ठ चित्र समोर यावे यासाठी प्रत्येक गावातील पिकांची प्रत्यक्ष व पारदर्शक पाहणी करण्यात यावी, अशी मागणी करण्यात आली आहे. शासनाच्या निर्धारित निकषांनुसार पीक कापणी प्रयोग घेण्यात यावेत आणि हे प्रयोग शक्यतो शेतकऱ्यांच्या उपस्थितीत व पारदर्शक पद्धतीने पार पाडावेत, असे निवेदनात म्हटले आहे.

पावसातील खंड, कमी पाऊस आणि अन्य नैसर्गिक कारणांमुळे झालेल्या पीक नुकसानीची योग्य नोंद प्रशासनाने करावी. प्रत्यक्ष शेतातील परिस्थिती आणि कागदोपत्री नोंद यामध्ये तफावत राहू नये, यासाठी पीक पाहणी व पंचनामे वस्तुनिष्ठ पद्धतीने करण्याची मागणी संघटनेने केली आहे.

नुकसानग्रस्त शेतकऱ्यांना मदतीचा मार्ग मोकळा करण्याची मागणी

अंतिम पैसेवारी ५० पैशांच्या आत निश्चित झाल्यास, नैसर्गिक आपत्तीमुळे नुकसान झालेल्या पात्र शेतकऱ्यांना शासनाच्या निकषांनुसार उपलब्ध मदत, सवलती, पीकविमा आणि इतर अनुज्ञेय योजनांचा लाभ मिळण्यास त्याचा आधार ठरू शकतो. त्यामुळे प्रत्यक्ष नुकसानीचे अचूक मूल्यांकन करून त्याची योग्य नोंद करणे आवश्यक असल्याचे संघटनेने म्हटले आहे.

निवेदनात खरीप पिकांची अंतिम पैसेवारी ५० पैशांच्या आत निश्चित करणे, पारदर्शक पीक पाहणी करणे, शेतकऱ्यांच्या उपस्थितीत पीक कापणी प्रयोग घेणे तसेच पात्र शेतकऱ्यांना नुकसानभरपाई, पीकविमा आणि इतर अनुज्ञेय सवलतींचा लाभ मिळण्यासाठी आवश्यक कार्यवाही करण्याच्या प्रमुख मागण्या करण्यात आल्या आहेत.

नायब तहसीलदारांनी स्वीकारले निवेदन

भडगाव तालुक्यातील शेतकऱ्यांची सद्यस्थिती आणि पिकांचे प्रत्यक्ष नुकसान लक्षात घेऊन प्रशासनाने तातडीने कार्यवाही करावी, अशी मागणी संघटनेने केली. तहसीलदार भडगाव यांच्या वतीने नायब तहसीलदार रमेश देवकर यांनी निवेदन स्वीकारले.

यावेळी शेतकरी संघटनेचे तालुकाध्यक्ष अखिलेश रविंद्र पाटील, उपाध्यक्ष वाल्मीक लोखंडे, धनराज पाटील, युवा अध्यक्ष लिलाधर पाटील, युवा उपाध्यक्ष सागर पाटील, डॉ. योगेश गोसावी, रामकृष्ण माळी, समाधान पाटील, सरदारसिंग पाटील, नरेंद्र पाटील, योगेश पाटील, संजय खैरनार, संजय पाटील, विकी पाटील, दिगंबर बोरसे आदी पदाधिकारी व शेतकरी उपस्थित होते.