पिंपरी-चिंचवडमधील स्वीकृत नगरसेवक पदांसाठी मागणी; वर्षा बंगल्यावर उद्या सकाळी भेट
पिंपरी-चिंचवड : पिंपरी-चिंचवड महानगरपालिकेत भारतीय जनता पार्टीच्या माध्यमातून जुन्या कार्यकर्त्यांना स्वीकृत नगरसेवक पदाची संधी मिळावी, या मागणीसाठी उद्या (दि. १३ एप्रिल २०२६) सकाळी ११ वाजता मुख्यमंत्री देवेंद्र फडणवीस यांची वर्षा निवासस्थानी भेट घेऊन ‘घंटा भेट’ देण्यात येणार आहे.
भाजपचे स्थानिक कार्यकर्ते सचिन काळभोर यांनी यासंदर्भात माहिती देताना सांगितले की, शहरातील जुन्या कार्यकर्त्यांनी पक्ष संघटना वाढवण्यासाठी दीर्घकाळ मेहनत घेतली आहे. विविध नागरी समस्यांवर मोर्चे, आंदोलने करून त्या सोडविण्यासाठी प्रयत्न केले. या आंदोलनांदरम्यान अनेक कार्यकर्त्यांवर शहरातील विविध पोलिस ठाण्यांमध्ये गुन्हेही दाखल झाले आहेत.
मात्र, येत्या निवडणुकांच्या पार्श्वभूमीवर जुन्या कार्यकर्त्यांना डावलले जात असल्याची भावना व्यक्त होत आहे. स्वीकृत नगरसेवक पदासाठीही नव्या चेहऱ्यांना संधी दिली जात असून, दीर्घकाळ पक्षाशी निष्ठा ठेवणाऱ्या कार्यकर्त्यांकडे दुर्लक्ष होत असल्याचा आरोप करण्यात आला आहे.
प्रभाग क्रमांक १३ मध्ये २०१७ साली भाजपचे नगरसेवक निवडून आणण्यासाठी जोरदार प्रयत्न करण्यात आले होते. आगामी निवडणुकांमध्येही या प्रभागातून तीन नगरसेवक निवडून आणण्याचे उद्दिष्ट ठेवून काम केले जात आहे. तरीदेखील पक्षाकडून अपेक्षित प्रतिनिधित्व मिळत नसल्याने कार्यकर्त्यांमध्ये नाराजी वाढत आहे. याउलट इतर पक्षांमध्ये नव्या कार्यकर्त्यांना संधी दिली जात असल्याचे उदाहरण देत, भाजपमधील जुन्या कार्यकर्त्यांना न्याय मिळावा, अशी मागणी करण्यात येत आहे. शहराध्यक्ष शत्रुघ्न काटे, आमदार महेश लांडगे, आमदार शंकर जगताप, आमदार उमा खापरे आणि अमित गोरखे यांनीही या प्रश्नाकडे लक्ष द्यावे, अशी अपेक्षा व्यक्त करण्यात आली आहे.
या पार्श्वभूमीवर मुख्यमंत्री देवेंद्र फडणवीस यांची सदिच्छा भेट घेऊन ‘घंटा भेट’ देत कार्यकर्त्यांच्या भावना व्यक्त केल्या जाणार आहेत. तसेच पिंपरी-चिंचवड महानगरपालिकेत स्वीकृत नगरसेवक पदासाठी जुन्या कार्यकर्त्यांना थेट संधी देण्याची मागणी करण्यात येणार आहे.शहरातील नागरी समस्या सोडवण्यासाठी भाजपच्या माध्यमातून अहोरात्र प्रयत्न सुरूच राहतील, असेही यावेळी स्पष्ट करण्यात आले आहे.
