लुंबिनी नगरात सामाजिक बांधिलकीचे दर्शन; गरजू विद्यार्थ्यांना मदतीचा हात
पुणे : तथागत गौतम बुद्ध यांच्या बुद्ध पौर्णिमेनिमित्त ताडीवाला रोड, लुंबिनी नगर येथे युवाशक्ती संघटनेच्या वतीने शरबत वाटप व शालेय साहित्य वितरणाचा सामाजिक उपक्रम राबविण्यात आला. या उपक्रमातून सामाजिक बांधिलकीचे प्रभावी दर्शन घडले.
कै. सोनूभाऊ अडसूळ यांच्या स्मरणार्थ आयोजित या कार्यक्रमात परिसरातील गरजू व होतकरू विद्यार्थ्यांना शालेय साहित्य वाटप करण्यात आले. यामध्ये वह्या, पुस्तके, पेन, पेन्सिल तसेच कंपासपेटी यांचा समावेश होता. या कार्यक्रमास राष्ट्रवादी काँग्रेस (शरदचंद्र पवार गट) पुणे शहर उपाध्यक्ष आनंद सवाणे, भीम छावा संघटनेचे संस्थापक शामभाऊ गायकवाड, सोनूभाऊ निकाळजे आणि दशरथ शेट्टी यांच्या हस्ते साहित्य वितरण करण्यात आले.
कार्यक्रमाचे आयोजन सामाजिक कार्यकर्ते प्रतिक कांबळे यांनी केले होते. यावेळी गणेश माने, सुनील जंगले, अलताफ शेख, पांडुरंग बनसोडे, निखिल जगताप, सकलेन शेख यांसह स्थानिक नागरिक उपस्थित होते. या उपक्रमामुळे बुद्ध पौर्णिमेचे औचित्य साधत समाजात सेवा, सहकार्य आणि शिक्षणाचे महत्त्व अधोरेखित झाले.
