अन्न सुरक्षा विभाग व पोलिसांची संयुक्त धडक कारवाई; गुटखा, पानमसाला, सुगंधी तंबाखूसह कार जप्त
चाळीसगाव | प्रतिनिधी
चाळीसगाव शहरात अन्न सुरक्षा विभाग आणि पोलिसांनी संयुक्तपणे राबविलेल्या धडक कारवाईत प्रतिबंधित गुटखा, पानमसाला व सुगंधी तंबाखूचा मोठा साठा जप्त केला. या कारवाईत एकूण ६ लाख ५७ हजार ८७ रुपयांचा मुद्देमाल हस्तगत करण्यात आला असून पाच जणांना अटक करण्यात आली आहे.
अन्न सुरक्षा अधिकारी शरद मधुकर पवार यांनी दिलेल्या फिर्यादीवरून चाळीसगाव शहर पोलीस ठाण्यात गुन्हा दाखल करण्यात आला आहे. ९ जुलै २०२६ रोजी मध्यरात्री हनुमानवाडी, आनंदवाडी आणि बसस्थानक परिसरात एकाचवेळी छापेमारी करण्यात आली.
कारवाईदरम्यान विमल पान मसाला, डायरेक्टर स्पेशल, पान पराग, आरएमडी, रजनीगंधा, राजश्री, राजनिवास, मिराज, केर कोकिल, तुळशी-००, रॉयल जाफरानी जर्दा, एम सुगंधी तंबाखू, बाबा, शॉट, केपी डबल ब्लॅक, झेडएन-०१ जाफरानी जर्दा यांसह विविध प्रतिबंधित तंबाखूजन्य पदार्थांचा मोठा साठा जप्त करण्यात आला. याशिवाय एमएच-१८ डब्ल्यू-८९७७ क्रमांकाची टाटा इंडिका कारही पोलिसांनी ताब्यात घेतली.
या प्रकरणी अजित चांदुमल रावलानी (४३), कुबेर शेखर कदम (२७), हितेश किशोर पवार (२१), निखिल राजेंद्र केसरवाणी (३१) आणि सौरभ संजय शिनकर (२७) यांना अटक करण्यात आली आहे. प्रतिबंधित गुटखा व तंबाखूजन्य पदार्थांची बेकायदेशीर वाहतूक व विक्री केल्याप्रकरणी आरोपींविरुद्ध भारतीय न्याय संहिता (BNS) तसेच अन्न सुरक्षा व मानके अधिनियम, २००६ अंतर्गत गुन्हा दाखल करण्यात आला आहे.
ही कारवाई उपविभागीय पोलीस अधिकारी विजयकुमार ठाकूरवाड आणि पोलीस निरीक्षक अमितकुमार मने यांच्या मार्गदर्शनाखाली करण्यात आली. या प्रकरणाचा पुढील तपास पोलीस उपनिरीक्षक संदीप घुले करीत आहेत,
