अण्णा भाऊ साठेंच्या साहित्याला राज्य सरकारचा मानाचा मुजरा; १ ऑगस्ट ‘लेखन प्रेरणा दिन’ म्हणून साजरा होणार

अण्णा भाऊ साठेंच्या साहित्याला राज्य सरकारचा मानाचा मुजरा; १ ऑगस्ट ‘लेखन प्रेरणा दिन’ म्हणून साजरा होणार

उच्च व तंत्र शिक्षण विभागाचा शासन निर्णय; विद्यापीठे, महाविद्यालये आणि शाळांमध्ये साहित्यिक उपक्रमांचे आयोजन बंधनकारक

मुंबई | धीरज सैतवाल (विशेष प्रतिनिधी):

मराठी साहित्यविश्वातील विश्वविख्यात लोकशाहीर, साहित्यसम्राट अण्णा भाऊ साठे यांच्या साहित्यिक कार्याचा गौरव करण्यासाठी महाराष्ट्र शासनाने ऐतिहासिक निर्णय घेतला आहे. यापुढे दरवर्षी १ ऑगस्ट, अण्णा भाऊ साठे यांच्या जयंतीदिनी संपूर्ण राज्यात ‘लेखन प्रेरणा दिन’ साजरा करण्यात येणार आहे. यासंदर्भातील अधिकृत शासन निर्णय (GR) उच्च व तंत्र शिक्षण विभागाने जारी केला आहे.

या निर्णयानुसार राज्यातील सर्व विद्यापीठे, महाविद्यालये तसेच इतर शैक्षणिक संस्थांमध्ये विद्यार्थ्यांमध्ये वाचन-लेखन संस्कृती रुजविण्यासाठी विविध साहित्यिक व सांस्कृतिक उपक्रमांचे आयोजन करण्यात येणार आहे.

विद्यार्थ्यांसाठी विविध साहित्यिक उपक्रम

‘लेखन प्रेरणा दिना’निमित्त विद्यार्थ्यांमध्ये सर्जनशीलतेला चालना देण्यासाठी विविध कार्यक्रम आयोजित केले जातील. त्यामध्ये—

• निबंध लेखन स्पर्धा

• कथा लेखन स्पर्धा

• कविता लेखन स्पर्धा

• वक्तृत्व स्पर्धा

• अण्णा भाऊ साठे यांच्या जीवन व साहित्यावर व्याख्याने

• परिसंवाद, वाचन व चर्चासत्रे

यांचा समावेश असेल.

लेखन संस्कृतीला चालना देण्याचा उद्देश

अण्णा भाऊ साठे यांनी आपल्या साहित्य, कादंबऱ्या, कथा आणि लोकशाहिरीच्या माध्यमातून उपेक्षित, श्रमिक आणि वंचित समाजाचे जीवन वास्तव प्रभावीपणे मांडले. त्यांच्या साहित्यामुळे सामाजिक न्याय, समता आणि मानवतेचे विचार जनमानसात पोहोचले.

नव्या पिढीने त्यांच्या साहित्याचा अभ्यास करावा, लेखनाची आवड जोपासावी आणि सामाजिक जाणिवा अधिक दृढ व्हाव्यात, या उद्देशाने हा निर्णय घेण्यात आल्याचे शासनाने स्पष्ट केले आहे.

साहित्य क्षेत्रातून स्वागत

राज्य सरकारच्या या निर्णयाचे साहित्यिक, लेखक, शिक्षक, विद्यार्थी आणि विविध सामाजिक संघटनांकडून स्वागत करण्यात येत असून, अण्णा भाऊ साठे यांच्या साहित्याचा अभ्यास आणि प्रसार अधिक व्यापक होण्यास या निर्णयामुळे चालना मिळेल, अशी अपेक्षा व्यक्त केली जात आहे.