कागदोपत्री ५० कर्मचारी, प्रत्यक्षात केवळ पाच; आरोग्य विभागाच्या कारभारावर महासभेत गंभीर आरोप!
“जनतेच्या पैशांची लूट थांबवा, अन्यथा एमआयएम स्टाईलने आंदोलन”; नगरसेवक जावेद बिल्डर आक्रमक
धुळे : धुळे महानगरपालिकेच्या आरोग्य विभागातील सफाई कर्मचाऱ्यांच्या उपस्थिती आणि कामकाजावरून महासभेत चांगलाच गदारोळ झाला. कागदोपत्री ५० कर्मचारी उपलब्ध असल्याचे दाखविले जाते; मात्र प्रत्यक्षात केवळ पाच कर्मचारी स्वच्छतेचे काम करत असल्याचा गंभीर आरोप एमआयएमचे नगरसेवक जावेद बिल्डर यांनी केला. या प्रकारामुळे आरोग्य विभागाच्या कारभारावर आणि कथित आर्थिक अनियमिततेवर प्रश्नचिन्ह उपस्थित झाले आहे.
यावेळी जावेद बिल्डर यांनी आरोग्य विभागात मोठ्या प्रमाणात भ्रष्टाचार सुरू असल्याचा आरोप करत नागरिकांच्या पैशांची लूट थांबवून प्रत्यक्षात स्वच्छतेचे काम करणाऱ्या कर्मचाऱ्यांची संख्या आणि उपस्थिती तपासावी, अशी मागणी केली.
“कर्मचारी कागदावर, काम मात्र मोजक्यांकडून!”
महानगरपालिकेच्या विविध प्रभागांमध्ये सफाई कर्मचाऱ्यांमार्फत स्वच्छतेचे काम केले जाते. मात्र, अनेक ठिकाणी कागदोपत्री मोठ्या संख्येने कर्मचारी दाखविले जात असले तरी प्रत्यक्ष कामावर अत्यल्प कर्मचारी उपस्थित राहत असल्याचा दावा नगरसेवक बिल्डर यांनी केला.
कर्मचाऱ्यांची हजेरी, प्रत्यक्ष कामावर उपस्थिती आणि त्यानुसार होणारे वेतन यामध्ये पारदर्शकता आणण्याची आवश्यकता असल्याचे त्यांनी महासभेत सांगितले.
आयुक्तांचीही दादागिरीची कबुली?
नगरसेवकांच्या आरोपांना उत्तर देताना मनपा आयुक्त नितीन कापडणीस यांनी काही सफाई कर्मचारी दादागिरी करत असल्याचे सांगितल्याचे नमूद करण्यात आले. कर्मचाऱ्यांच्या प्रत्यक्ष उपस्थितीवर नियंत्रण ठेवण्यासाठी आणि कामकाजात पारदर्शकता आणण्यासाठी लवकरच ॲप तयार करण्यात येणार असून, कामावर उपस्थित असलेल्या कर्मचाऱ्यांचे फोटो त्यावर अपलोड केले जातील, अशी माहिती आयुक्तांनी दिली.
या उपाययोजनेमुळे कागदोपत्री हजेरी आणि प्रत्यक्ष उपस्थितीतील फरक स्पष्ट होण्यास मदत होईल, अशी अपेक्षा व्यक्त केली जात आहे.
हजेरीच्या वादातून मुकादमाला मारहाण
दरम्यान, सफाई कर्मचाऱ्यांच्या हजेरीच्या वादातून दोन दिवसांपूर्वी शहरातील पाच कंदील परिसरात मनपाच्या एका मुकादमाला दोन सफाई कर्मचाऱ्यांनी मारहाण केल्याचा प्रकार समोर आला आहे. या प्रकरणी संबंधितांविरुद्ध गुन्हाही दाखल करण्यात आला असल्याची माहिती आहे.
या घटनेमुळे आरोग्य विभागातील कर्मचारी व्यवस्थापन, हजेरी आणि नियंत्रणाचा मुद्दा पुन्हा ऐरणीवर आला आहे.
“भ्रष्टाचार थांबवा, अन्यथा एमआयएम स्टाईलने आंदोलन”
आरोग्य विभागातील कथित गैरप्रकार आणि कागदोपत्री चालणारा भ्रष्टाचार तात्काळ थांबवावा, तसेच नागरिकांना त्यांच्या कराच्या पैशातून योग्य आरोग्य व स्वच्छता सुविधा मिळाव्यात, अशी मागणी नगरसेवक जावेद बिल्डर यांनी केली.
“आरोग्य विभागातील गैरप्रकार तात्काळ थांबवा. नागरिकांना योग्य सुविधा द्या; अन्यथा एमआयएम स्टाईलने आंदोलन करण्यात येईल,” असा इशाराही त्यांनी महासभेत दिला.
दरम्यान, नगरसेवकांनी केलेल्या गंभीर आरोपांवर प्रशासनाकडून सखोल चौकशी करून वस्तुस्थिती स्पष्ट केली जाणार का, तसेच प्रस्तावित ॲपच्या माध्यमातून कर्मचाऱ्यांच्या प्रत्यक्ष उपस्थितीवर कितपत नियंत्रण येते, याकडे आता धुळेकरांचे लक्ष लागले आहे.
