पाचोरा (जळगाव) : तालुक्यातील लाख तांडा येथे अल्पवयीन मुलीवर अत्याचाराचा प्रयत्न झाल्याची धक्कादायक घटना समोर आली असून, या प्रकरणातील आरोपी अद्याप मोकाट फिरत असल्याचा आरोप करण्यात येत आहे. या पार्श्वभूमीवर सामाजिक कार्यकर्ते आनंदभाऊ खरे यांनी आरोपीला तात्काळ अटक करून पीडित कुटुंबाला पोलीस संरक्षण देण्याची मागणी केली आहे.
मिळालेल्या माहितीनुसार, 16 मार्च 2026 रोजी पीडित मुलगी घरी एकटी असताना आरोपी किशन प्रकाश बेलदार याने घरात घुसून तिच्यावर अश्लील हावभाव करत जबरदस्तीने अत्याचार करण्याचा प्रयत्न केला. मात्र पीडितेने आरडाओरड केल्यामुळे आरोपी घटनास्थळावरून पळून गेला. या घटनेनंतर 17 मार्च रोजी पिंपळगाव पोलीस ठाण्यात संबंधित आरोपीविरोधात गुन्हा दाखल करण्यात आला आहे.
या प्रकरणात अनुसूचित जाती-जमाती अत्याचार प्रतिबंधक कायदा, बालकांचे लैंगिक अपराधांपासून संरक्षण (POCSO) कायदा तसेच भारतीय न्याय संहितेतील विविध कलमांनुसार गुन्हा नोंदवण्यात आला आहे. तरीदेखील आरोपीला अद्याप अटक करण्यात आलेली नसल्याने संताप व्यक्त केला जात आहे.
सामाजिक कार्यकर्ते आनंदभाऊ खरे यांनी दिलेल्या निवेदनात नमूद केले आहे की, आरोपीची पार्श्वभूमी गुन्हेगारी स्वरूपाची असून त्याला राजकीय पाठबळ असल्यामुळे स्थानिक पोलीस प्रशासन कारवाई करण्यास टाळाटाळ करत असल्याचा आरोप आहे. त्यामुळे आरोपीचे मनोबल वाढत असून, पीडित मुलगी आणि तिच्या कुटुंबाच्या सुरक्षिततेवर धोका निर्माण झाला आहे.
सध्या पीडित कुटुंब भीतीच्या छायेखाली जीवन जगत असून त्यांना तातडीने पोलीस संरक्षण देण्याची आवश्यकता असल्याचे खरे यांनी स्पष्ट केले आहे. तसेच, आरोपीला त्वरित अटक करून कठोर कारवाई करावी, अन्यथा राज्यव्यापी आंदोलन उभारण्याचा इशाराही त्यांनी दिला आहे. या संदर्भात उपविभागीय अधिकारी, वसमत यांच्या मार्फत राज्याचे गृहमंत्री यांच्याकडे निवेदन सादर करण्यात आले असून, प्रशासनाने तातडीने दखल घेण्याची मागणी करण्यात आली आहे.
दरम्यान, या प्रकरणामुळे परिसरात भीती आणि संतापाचे वातावरण निर्माण झाले असून, आरोपीला लवकरात लवकर अटक होणार का, याकडे सर्वांचे लक्ष लागले आहे.
