नाशिक : नाशिकमधील ज्योतिषी आणि भोंदूगिरी करणारा अशोक खरातवर लैंगिक शोषणाचे आरोप लागले आहेत. त्याचे व्हिडिओ समोर आल्यानंतर देशभरात संतापाची लाट उसळली आहे. तर गुजरातमध्ये एका बाबाने अजून एक कांड केले आहे. अहमदाबाद गुन्हे शाखेने सुरत येथे नकली नोटा छापणाऱ्या आश्रमाचा पर्दाफाश केला आहे. पोलिसांनी या आश्रमातून 2 कोटी रुपयांहून अधिकच्या नोटा जप्त केल्या आहेत. सुरत जवळील कामरेज तालुका आहे. येथील पारडी गावात ‘श्री सत्य योग फाउंडेशन’ या आश्रमात हे असत्याचे प्रयोग सुरू होते. बाहेरून धर्माचे पांघरूण घेऊन आत नकली नोटांचा गोरखधंदा सुरू होता. देशाची अर्थव्यवस्था खिळखिळी करण्याचे पाप या आश्रमातून सुरू होते.
40 हजारांहून अधिक नकली नोटा जप्त
गुन्हे शाखेला एक गुप्त माहिती मिळाली होती. त्यानुसार, सुरत येथून नकली नोटांची एक मोठी खेप अहमदाबाद येथे आणण्यात येणार असल्याची माहिती देण्यात आली होती. पोलिसांनी गुप्त माहिती आधारे अमराईवाडी परिसरात नाकाबंदी केली होती. तिथे काही महिला आणि 6 पुरुषांच्या संशयास्पद हालचालींनी पोलीस सतर्क झाले. त्यांना अटक करण्यात आली. त्यावेळी त्यांच्याकडून 500 रुपयांच्या 40 हजारांहून अधिक नकली नोटा हस्तगत करण्यात आल्या. या नोटांची एकूण किंमत जवळपास 2 कोटी रुपये असल्याचे समोर आले आहे.
500 रुपये द्या आणि तीनपट अधिक नोटा मिळवा
या नोटा सुरत येथील वराछा या परिसरात छापल्याचे समोर आले. या नोटा बाजारात चालवण्यासाठी खास योजना आखण्यात आली होती. त्यानुसार खरी 500 रुपयांची नोट द्या आणि 1500 रुपयांच्या नकली नोटा मिळवा अशी स्कीम होती. या भामट्यांनी 66 लाख खऱ्या नोटांच्या बदल्यात 2 कोटी रुपयांच्या खोट्या नोटा बाजारात आणण्याची योजना आखली होती. पण त्यापूर्वीच त्यांचा भांडाफोड झाला.
आश्रमात नोटांचा छापखाना
पोलिसांनी संबंधित आश्रमात छापा टाकला. तिथे प्रिंटिंग मशीन, संगणक, खास कागद, रंग आणि काही महत्त्वाची कागदपत्रं त्यांच्या हाती लागली. आश्रमातील वाहनांचा वापरही या नकली नोटांच्या रॅकेटसाठी करण्यात आल्याचे तपासात समोर आले आहे. पंचनामा दरम्यान पोलिसांनी 40 हजारांहून अधिक नकली नोटा जप्त केल्या. या नकली नोटांचे रॅकेटचे देशभरात कनेक्शन असण्याची शक्यता आहे. पोलिसांनी त्यासाठी तपासाची व्याप्ती वाढवली आहे.
