दारू पिऊन बस चालविल्याचा आरोप; शेदुर्णी रोडवर अपघात, सोयगाव आगाराचा कारभार चर्चेत!

प्रवाशांच्या सुरक्षेचा प्रश्न ऐरणीवर;  शिवसेनेने डेपो मॅनेजर परळीकर यांना निवेदन देत कारवाईची मागणी केली

सोयगाव, शिवराम जाधव (प्रतिनिधी) : सोयगाव–शेदुर्णी रोडवर दोन दिवसांपूर्वी एसटी बसचा अपघात झाल्याने सोयगाव आगाराच्या कारभारावर प्रश्नचिन्ह उपस्थित झाले आहे. संबंधित बसचालकाने दारूच्या नशेत बस चालविल्याचा आरोप करण्यात आला असून, बसने एका वाहनाला जोरदार धडक दिल्याची माहिती समोर आली आहे. या अपघातात समोरील वाहनातील प्रवासी सुखरूप बचावले; मात्र एसटी बसमधील काही प्रवासी किरकोळ जखमी झाल्याचे सांगण्यात आले. या घटनेमुळे सार्वजनिक वाहतुकीतील प्रवाशांच्या सुरक्षेचा मुद्दा पुन्हा ऐरणीवर आला आहे.

शिवसेनेचे आगार व्यवस्थापनाला निवेदन

या घटनेच्या निषेधार्थ शिवसेनेच्या वतीने १० ऑक्टोबर रोजी सोयगाव आगाराचे डेपो मॅनेजर परळीकर यांना निवेदन देण्यात आले. बसचालकांकडून मद्यप्राशन करून वाहन चालविले जात असल्याच्या तक्रारींची गंभीर दखल घेऊन योग्य ती चौकशी करावी आणि दोषी आढळणाऱ्यांवर तातडीने कारवाई करावी, अशी मागणी या निवेदनातून करण्यात आली.

निवेदनात काही चालक मद्यप्राशन करून बस चालवत असल्याचा आरोप करण्यात आला आहे. अशा प्रकारांमुळे प्रवाशांच्या जीवाला धोका निर्माण होऊ शकतो. त्यामुळे आगार व्यवस्थापनाने चालकांच्या वर्तनावर आणि सुरक्षिततेच्या नियमांच्या पालनावर लक्ष ठेवावे, अशी मागणी शिवसेनेने केली.

‘प्रवाशांच्या सुरक्षेशी तडजोड नको’

निवेदनाद्वारे शिवसेनेने इशारा देताना, भविष्यात मद्यप्राशन करून वाहन चालविणारा चालक आढळल्यास त्याच्याविरोधात तीव्र आंदोलनात्मक भूमिका घेतली जाईल, असे म्हटले आहे. प्रवाशांच्या सुरक्षेशी कोणत्याही परिस्थितीत तडजोड होता कामा नये, अशी भूमिका शिवसेनेच्या पदाधिकाऱ्यांनी मांडली.

दोषी चालकावर कारवाईची मागणी

सार्वजनिक वाहतूक व्यवस्थेत बसचालकांवर मोठी जबाबदारी असते. त्यामुळे मद्यप्राशन करून वाहन चालविण्याचा आरोप गंभीर असून, संबंधित घटनेची अधिकृत चौकशी करून वस्तुस्थिती स्पष्ट करणे आवश्यक आहे. अपघाताची कारणे, चालकाची वैद्यकीय तपासणी झाली आहे का आणि आगार व्यवस्थापनाने कोणती कारवाई केली, याबाबत अधिकृत माहिती समोर आलेली नाही.

या वेळी नगरसेवक बंटी काळे, नगरसेवक राजू दुतोंडे, संदीप चौधरी, समाजसेवक अरुण सोहनी, डॉ. अजय वाडेकर, विकास रोकडे, दिनेश पंडित आदी शिवसैनिक उपस्थित होते.

अपघाताच्या पार्श्वभूमीवर संबंधित चालकाच्या भूमिकेची चौकशी करून दोष सिद्ध झाल्यास नियमानुसार कठोर कारवाई करावी, तसेच भविष्यात अशा घटना टाळण्यासाठी आगार प्रशासनाने प्रतिबंधात्मक उपाययोजना कराव्यात, अशी मागणी करण्यात येत आहे.