वाढदिवसाचा जल्लोष टाळत बळीराजासाठी मदतीचा हात; मुख्यमंत्री सहाय्यता निधीसाठी ५ लाखांचा धनादेश!

आमदार किशोर आप्पा पाटील यांच्या आवाहनाला शिवसेना पदाधिकारी व स्व. बापुजी युवा फाउंडेशनचा उत्स्फूर्त प्रतिसाद; वाढदिवसाचा खर्च टाळून शेतकऱ्यांसाठी सामाजिक बांधिलकी

भडगाव | प्रतिनिधी – गणेश रावळ

राज्यात यंदा दुष्काळाचे सावट असून शेतकरी संकटाचा सामना करत आहेत. अशा परिस्थितीत वाढदिवसाचा अनावश्यक खर्च टाळून तोच पैसा गरजू शेतकऱ्यांच्या मदतीसाठी द्यावा, असे संवेदनशील आवाहन कार्यसम्राट आमदार किशोर आप्पा पाटील यांनी केले होते. त्यांच्या या आवाहनाला प्रतिसाद देत भडगावमध्ये शिवसेना पदाधिकारी, नगरसेवक आणि स्व. बापुजी युवा फाउंडेशनच्या वतीने एकूण पाच लाख रुपयांची मदत मुख्यमंत्री सहाय्यता निधीसाठी सुपूर्द करण्यात आली.

पुष्पगुच्छ, केक आणि बॅनरच्या खर्चाला फाटा

दरवर्षी शिवसेना, युवासेना आणि स्व. बापुजी युवा फाउंडेशनच्या वतीने विविध सामाजिक, सांस्कृतिक कार्यक्रम आणि स्पर्धांच्या माध्यमातून आमदार किशोर आप्पा पाटील यांचा वाढदिवस उत्साहात साजरा केला जातो. मात्र, यंदा दुष्काळी परिस्थितीचे गांभीर्य लक्षात घेऊन पुष्पगुच्छ, केक, बॅनर आणि इतर उत्सवी खर्चाला फाटा देत सामाजिक बांधिलकी जपण्याचा निर्णय घेण्यात आला.

शिवसेना पदाधिकारी आणि फाउंडेशनकडून प्रत्येकी अडीच लाखांची मदत

आमदारांच्या आवाहनाला सकारात्मक प्रतिसाद देत भडगाव नगरपरिषदेच्या लोकनियुक्त नगराध्यक्षा, उपनगराध्यक्ष, गटनेते आणि शिवसेनेच्या सर्व नगरसेवक-नगरसेविकांच्या वतीने अडीच लाख रुपये, तर स्व. बापुजी युवा फाउंडेशनच्या वतीने अडीच लाख रुपये, असे एकूण पाच लाख रुपयांचे धनादेश मुख्यमंत्री सहाय्यता निधीसाठी देण्यात आले.

प्रांताधिकारी भूषण आहिरे यांच्याकडे धनादेश सुपूर्द

पाचोरा येथील उपविभागीय अधिकारी कार्यालयात प्रांताधिकारी भूषण आहिरे यांच्याकडे सदर धनादेश सुपूर्द करण्यात आले. यावेळी उपनगराध्यक्ष राजेंद्र जिभू पाटील, शिवसेना गटनेते लखीचंद भाऊ पाटील, जहागीर मालचे, नगरसेवक जगन भोई, संतोष महाजन, आसिम मिर्झा, अतुल परदेशी, देवा आहिरे, जितेंद्र आचारी, राहुल ठाकरे, अलीम शहा, सौरभ देशमुख, शुभम भोसले, शेख वकार, प्रशांत सोनवणे यांच्यासह शिवसेना पदाधिकारी आणि कार्यकर्ते उपस्थित होते.

‘वाढदिवसाचा जल्लोष नाही, बळीराजाच्या मदतीचा हात!’

वाढदिवसाचा थाट बाजूला ठेवून संकटग्रस्त शेतकऱ्यांच्या मदतीसाठी पुढाकार घेण्याचा हा निर्णय सामाजिक संवेदनशीलतेचे दर्शन घडवणारा ठरला आहे. संकटाच्या काळात उत्सव साजरा करण्यापेक्षा अडचणीत सापडलेल्या बांधवांच्या पाठीशी उभे राहणे अधिक महत्त्वाचे असते, हा संदेश या उपक्रमातून देण्यात आला.

‘वाढदिवसाचा जल्लोष नाही, बळीराजाच्या मदतीचा हात!’ या संकल्पनेतून राबविण्यात आलेला हा उपक्रम सामाजिक बांधिलकी आणि शेतकऱ्यांप्रती सहवेदना व्यक्त करणारा ठरला.