दिव्यांगत्वावर भक्तीचा विजय; पंढरीच्या वारीत जिद्द, श्रद्धा आणि आनंदाचा हृदयस्पर्शी संदेश
पंढरपूर | प्रतिनिधी
पंढरीच्या वारीत शारीरिक मर्यादा कधीच भक्तीच्या आड येत नाहीत, याचे हृदयस्पर्शी उदाहरण एका दिव्यांग वारकऱ्याने घालून दिले आहे. एका पायाने दिव्यांग असलेला हा वारकरी हातात कुबडीचा आधार घेत इतर वारकऱ्यांसोबत आनंदाने फुगडी खेळताना दिसला. त्याच्या या भक्तीमय आनंदाने उपस्थित वारकरी आणि भाविक भारावून गेले.
चेहऱ्यावर अपंगत्वाचे दुःख नव्हते, तर विठ्ठलनामाचा उत्साह आणि भक्तीचा आनंद ओसंडून वाहत होता. कुबडीचा आधार घेतही त्याने खेळलेली फुगडी पाहून अनेकांच्या डोळ्यांत आनंदाश्रू तरळले.
या प्रसंगाने एक गोष्ट अधोरेखित केली की, वारी करण्यासाठी केवळ मजबूत पाय नव्हे, तर पांडुरंगावरील अढळ श्रद्धा, जिद्द आणि भक्तिभाव आवश्यक असतो. शारीरिक अडचणींवर मात करून या वारकऱ्याने भक्तीची नवी व्याख्या समाजासमोर ठेवली.
अशा प्रेरणादायी क्षणांमुळे वारी ही केवळ धार्मिक परंपरा नसून समता, जिद्द, श्रद्धा आणि मानवतेचा जिवंत उत्सव असल्याची प्रचिती पुन्हा एकदा आली.
