भारतीय क्रिकेटचा ‘संकटमोचक’ थांबला! अजिंक्य रहाणेची आंतरराष्ट्रीय क्रिकेटमधून निवृत्ती

भारतीय क्रिकेटचा ‘संकटमोचक’ थांबला! अजिंक्य रहाणेची आंतरराष्ट्रीय क्रिकेटमधून निवृत्ती

ऑस्ट्रेलियातील ऐतिहासिक मालिकाविजयाचा शिल्पकार म्हणाला ‘अलविदा’; ८५ कसोटींमध्ये ५,०७७ धावांची संस्मरणीय कारकीर्द

नशिराबाद | प्रतिनिधी : धीरज सैतवाल

भारतीय कसोटी संघाचे माजी उपकर्णधार आणि परदेशी मैदानांवरील भारताचे सर्वात विश्वासार्ह फलंदाज म्हणून ओळखले जाणारे अजिंक्य रहाणे यांनी आंतरराष्ट्रीय क्रिकेटमधून निवृत्ती जाहीर केली आहे. सोशल मीडियावर भावनिक संदेश आणि व्हिडिओ शेअर करत त्यांनी आपल्या प्रदीर्घ आणि यशस्वी आंतरराष्ट्रीय कारकिर्दीला पूर्णविराम दिला.

ऑस्ट्रेलिया दौऱ्यातील ऐतिहासिक नेतृत्व

रहाणेच्या कारकिर्दीतील सर्वात सुवर्णक्षण म्हणजे २०२०-२१ चा ऑस्ट्रेलिया दौरा. अ‍ॅडलेड कसोटीतील पराभवानंतर आणि नियमित कर्णधार विराट कोहलीच्या अनुपस्थितीत त्यांनी भारतीय संघाची धुरा समर्थपणे सांभाळली. मेलबर्न कसोटीत झळकावलेल्या शतकी खेळीच्या बळावर भारताने मालिकेत पुनरागमन केले आणि अखेर २-१ ने ऐतिहासिक बॉर्डर-गावस्कर ट्रॉफी जिंकली. रहाणेच्या शांत, संयमी आणि प्रभावी नेतृत्वाचे जगभर कौतुक झाले.

अशी राहिली कारकीर्द

अजिंक्य रहाणे यांनी भारतासाठी तिन्ही प्रकारच्या आंतरराष्ट्रीय क्रिकेटमध्ये महत्त्वपूर्ण योगदान दिले.

• ८५ कसोटी सामने – ५,०७७ धावा, १२ शतके

• ९० एकदिवसीय सामने

• २० टी-२० आंतरराष्ट्रीय सामने

• २०२३ जागतिक कसोटी अजिंक्यपद स्पर्धेच्या (WTC Final) अंतिम सामन्यात भारताकडून सर्वाधिक धावा करणारा फलंदाज

आपल्या शिस्तबद्ध फलंदाजी, उत्कृष्ट स्लिप क्षेत्ररक्षण आणि कठीण प्रसंगी संघाला सावरण्याच्या क्षमतेमुळे रहाणे यांनी भारतीय क्रिकेटमध्ये वेगळी ओळख निर्माण केली. त्यांच्या निवृत्तीमुळे भारतीय क्रिकेटमधील एका महत्त्वाच्या पर्वाचा शेवट झाला असून, क्रिकेटप्रेमींकडून त्यांना भावपूर्ण निरोप दिला जात आहे.